Uning qismati shunchaki moda olamidagi fojia emas. Bu samimiylikka o‘rin yo‘q dunyoda o‘zligini saqlab qolishga intilgan yosh qiz haqidagi hikoyadir.
Kim Da Ul 1989-yil 31-mayda Seulda tavallud topgan. Bolaligidanoq san’atga qiziqib, o‘smirlik paytidayoq modellik faoliyatini boshlagan. Ilk bor kamera qarshisiga chiqqanida atigi 13 yoshda edi. Janubiy Koreyada tez orada shuhrat qozonib, mahalliy Vogue va Harper’s Bazaar jurnallari muqovalariga suratga tushadi hamda 2007-yilda Parij moda haftaligida debyut qiladi.
Karyeradagi muvaffaqiyat
Xalqaro maydonda Kim Da Ul yoki o‘z rasmlari va blogida imzo qo‘ygani kabi shunchaki Kim - tez orada mashhur bo‘ldi. Uning beg‘ubor chehrasi Britaniyaning Vogue, i-D, Dazed va Confused jurnallari sahifalarini bezab turardi.
Karl Lagerfeld, Vivyen Vestvud va Aleksandr Makkuin kabi buyuk modelyerlar osiyolik go‘zallarga e’tibor qaratgan payt edi.
U ideal ko‘rinardi: baland bo‘yli, zamonaviy, dadil fe’l-atvorli. 2008-yilda Anan jurnali uni yilning eng yaxshi modeli deb e’tirof etdi. Kim H&M, GAP, Topshop va Chanel uchun reklamalarda suratga tushgan. Modellik faoliyati bilan bir vaqtda u “I Like to Fork Myself” nomli blog yuritardi va rasm chizardi — u ovoz chiqarib aytolmagan fikrlarini suratlarda ifodalardi.
Sahna ortidagi portret
Kim rassomchilikka qiziqar, ko‘rgazmalar uyushtirar, Klaus Kinskiy filmlarini sevib tomosha qilar, qadimiy sanchqilarni to‘plar va hatto tanasiga yulduz shaklidagi tatuirovka ham qildirgan edi. Tashqi ko‘rinishidan zamonaviy uslub timsoliga aylangan bu qiz ichki dunyosi tashvishli, nozik, yoshiga nisbatan ancha ulg‘aygan, yolg‘izlik va ruhiy toliqishni boshdan kechirayotgan qizaloq edi.
U o‘z kechinmalarini blogida baham ko‘rardi. Unda depressiya, o‘ziga zarar yetkazish, holdan toyish va og‘riq haqidagi yozuvlar bor edi. 2007-yildayoq u shunday deb yozgandi: “Yuzimni parchalab tashlayman... Da Ul sifatidagi hayotim juda baxtsiz va yolg‘iz. Iltimos, boshqa olamdagi yolg‘izligimni men bilan baham ko‘ring”.
Keyin qo‘shib qo‘yardi: “Hazillashyapman. Hammasi joyida. Shunchaki charchaganman”. 2009-yil oktyabr oyida, Nyu York moda haftaligi paytida, u: “Juda tushkunlikka tushganman va holdan toyganman”, deb yozgan edi.
So‘nggi post
2009-yilning kuzida Kim Parijga ko‘chib o‘tadi — bu uning karyerasidagi yangi bosqich edi. Biroq yangi yutuqlar o‘rniga fojiali yakun yuz beradi. 2009-yil 19-noyabrda uni Parijdagi kvartirasidan o‘lik holda topishadi. O‘lim sababi — o‘z joniga qasd qilish. O‘shanda Kim atigi 20 yoshda edi.
Uning blogidagi so‘nggi yozuv Jim Riversning “I Go Deep” qo‘shig‘i bo‘lib, u “Say Hi to Forever” sarlavhasi ostida e’lon qilingan.
Kim o‘sha yili vafot etgan to‘qqizinchi janubiy koreyalik mashhur shaxs bo‘ldi. Uning o‘limi moda olamini larzaga soldi — ko‘pchilik uchun u shunchaki model emasdi. U sanoat haqida gapirishni yoqtirmaydigan haqiqat timsoli edi: bosim, yolg‘izlik va o‘z-o‘zidan qo‘rqish kabi muammolarning ramzi bo‘ldi.
O‘limidan so‘ng
Yillar o‘tgach, Kim uslub va ichki kurash ramzi sifatida xotirlandi. Uning o‘limi nafaqat yarqiroq va mukammal tashqi qiyofaga, balki uning ortidagi haqiqatga ham e’tibor qaratish naqadar muhimligini eslatadi. U o‘zini na rassom, na inson sifatida to‘liq namoyon etishga ulgurmadi. Biroq uning samimiyati va nozikligi moda tarixining ajralmas qismiga aylandi.
U atigi 20 yil umr ko‘rdi. Ammo shu qisqa vaqt ichida ham dunyoga ko‘pchilikdan ko‘ra ko‘proq narsa aytishga ulgurdi.
Izoh (0)