15-fevral kuni Payariq shahri “Go‘zal” mahalla fuqarolar yig‘ini Jaloliddin Manguberdi ko‘chasida yashovchi fuqaro N.E. tuman tibbiyot birlashmasiga qarashli Reanimatsiya bo‘limida navbatchilikda bo‘lgan anesteziolog-reanimatolog shifokor Xurshid Abdurasulovni haqorat qilib, uning qo‘llariga jarohat yetkazgan. Shuningdek, reanimatsiya bo‘limi boshlig‘i Abdumajid Ergashevni haqorat qilgan. Mazkur voqeaga yuzasidan “Daryo” muxbiri Farhod Norbo‘tayev jurnalistik surishtiruv olib bordi.
– 15-fevral kuni tungi navbatchilik paytida soat taxminan 21:00 atrofida tez yordam mashinasida bemor ayol olib kelindi. Bemor bizning bo‘limga olib kelinmasdan avval vafot etgan ekan, – deydi reanimatsiya bo‘limi boshlig‘i Abdumajid Ergashev. – Biz bemorning yaqinlariga u allaqachon vafot etganligini aytib hamdardlik bildirib uni olib ketish lozimligini aytdik. Biroq mast holatda bo‘lgan N.E. janjal qilib eshiklarning oynalarni sindirib tashladi.
Ma’lum bo‘lishicha, 58 yoshli ayol bir necha yillar davomida qalqonsimon bez kasalligi va bronxial astma kasalligi bilan xastalanib, davolanib yurgan ekan. Bemor uyida astma kasalligi xuruj berishi natijasida joni uzilgan. Bemor vafot etganidan so‘ng uning yaqinlari tez tibbiy yordamni chaqirishgan. Tez tibbiy yordam shifokori tekshiruvdan o‘tkazib, unda hayot belgilari yo‘qligi, bemor olamdan o‘tganligini aytib ularga hamdardlik bildirgan. Biroq mast holatda bo‘lgan farzandlari vafot etgan odamga yordam berishni talab qilgan. Ularning vajohati kuchayib boraverganidan so‘ng tez yordam shifokori sun’iy nafas bergan. Keyin adrenalin dorisidan yuborgan. Sun’iy nafas berilganda havo oshqozon va qoringa qarab o‘tgan. Marhuma ozgina qimirlaganda boyagi havo chiqishi natijasida qorin qismi xuddi nafas olgandek qimirlagan. Bu holatni ko‘rgan marhumaning farzandlari sen nima deyapsan, mana nafas olyaptiku deya vafot etgan odamni shifokorga olib borasan deb majburlagan.
– Bemorni baqir-chaqir bilan olib keldi. Reanimatsiyaga kelishi bilan uni ahvolini ko‘rib vafot etganligini aytdik. Hattoki tanasi sovib bo‘lgandi. Hatto tanada murda dog‘lari ham paydo bo‘lgandi. Biz bemor o‘lgan ekanligini aytganimiz bilanoq mast o‘g‘li janjal qilib eshiklarning oynalarni sindirib tashladi, – deydi shifokor Xurshid Abdurasulov. – Bo‘limdagi og‘ir kasallar yotgan bemorlar palatasidagi eshikning oynasini ham sindirib tashladi. Biz u palatada yotgan bemorni ahvolini katta qiyinchilik bilan yaxshilab olgandik. Bemorlar tinchligini buzmang deganimizdan so‘ng bizga yopishib ketdi. Natijada ikkita barmog‘imni sindirib oldim. Boshqa bo‘limdagi shifokorlarni va ichki ishlar xodimini chaqirib qiyinchilik bilan vaziyatni bartaraf etdik.
Mazkur holat yuzasidan chaqiruv asosida bemor xonadoniga borgan Payariq tuman tibbiyot birlashmasi tez tibbiy yordam bo‘limi shifokori bilan ham suhbatda bo‘ldik. Shifokor o‘zini nomini oshkor qilmaslikni, o‘sha kungi voqealar hamon ko‘z oldidan ketmayotganligini bildirdi.
– Borganimda bemorni tekshirib ko‘rib uni vafot etganligini aytdim. Ammo farzandlarining qistovi sabab sun’iy nafas berib, yurakka quvvat beruvchi dori qildim. Biroq bemorda o‘pka va yurak faoliyati tiklanmadi, – deydi tez tibbiy yordam shifokori. – Bemorning farzandlari uni shifoxonaga olib borasan deb bosim o‘tkazganidan so‘ng tibbiyot birlashmasiga olib keldim.
N.E.ning asossiz janjali, shifoxonadagi tartibni buzgani va bemorlarning hayotiga xavf soluvchi holatlarni keltirib chiqargani uchun jabrlanuvchi shifokor Xurshid Abdurasulov huquqni muhofaza qiluvchi organlarga murojaat qilgan. Biroq bo‘lgan voqea yuzasidan qilgan murojaatini tuman prokuraturasi qabul qilmagan.
– Shifoxonada sodir bo‘lgan janjal yuzasidan tuman prokuraturasiga tibbiyot birlashmamiz nomidan murojaat qildik. Ammo prokuratura bunaqangi arizalarni qabul qilmaymiz deb arizamizni qaytarib yubordi, – deydi Xurshid Abdurasulov. – Shifokorlarni odam o‘rnida ko‘rmay qo‘ydi. Tuman tibbiyot birlashmasida so‘nggi paytlarda bunaqangi holatlar juda ko‘p bo‘lmoqda. Nahotki bunday holatlarning oldini olishning imkoni bo‘lmasa?
Payariq tuman TTB Reanimatsiya bo‘limida navbatchilikda bo‘lgan anesteziolog-reanimatolog shifokor Xurshid Abdurasulov hamda reanimatsiya bo‘limi boshlig‘i bilan bog‘liq holatni o‘rganish jarayonida tuman IIB Tergov bo‘limi tomonidan tezkor-surishtiruv ishlari olib borilayotganligiga guvoh bo‘ldik. Tuman Ichki ishlar bo‘limi boshlig‘i holat yuzasidan atroflicha o‘rganish va surishtiruv ishlarini olib borib, qonunbuzarga nisbatdan tegishli tartibda chora ko‘rilishini bildirib o‘tdi.
Izoh (0)