Baring Vostok investitsiya kompaniyasi asoschisi, AQSh fuqarosi Maykl Kalvi “Vostochniy ekspress” bankidan 2,5 milliard rubl o‘g‘irlashda gumon qilinib, qo‘lga olingani haqida xabar berilgandi.
Meduza nashriga ko‘ra, Kalvi nazorati ostidagi yana bir kompaniya — Birinchi kollektorlik byurosining bankdan shuncha miqdorda qarzi bo‘lgan. U kreditni qaytarish o‘rniga 2017-yil fevralida bankka IFTG kompaniyasi aksiyalarini beradi va ular 3 milliard rubl turishini aytadi.
Joriy yil fevralida bank direktorlar kengashi a’zosi Sherzod Yusupov Rossiya FXXga kelib, Kalvi va kelishuvning boshqa ishtirokchilari uni aldaganidan shikoyat qiladi. FXX auditorlik bahosiga tayanib, ushbu aksiyalar chindan ham 3 milliard emas, 600 ming rubl turishini tasdiqlaydi va Kalvi hamda uning sheriklarini firibgarlikda ayblaydi.
Maykl Kalvining ta’kidlashicha, 2017-yil fevralidagi bitim chog‘ida Yusupovni hech kim aldamagan, u IFTG kompaniyasi aksiyalariga doir barcha ma’lumotlar bilan tanish bo‘lgan.
Ma’lumot uchun, Sherzod Yusupov o‘zbekistonlik bo‘lib, 1981-yilda Urganchda tug‘ilgan. Rossiyadagi “Vostochniy” va “Modulbank” egalaridan biri hamda direktorlar kengashi a’zosi. U “Buyuk Kelajak” xalqaro nodavlat notijorat tashkiloti ishtirokchisi hisoblanadi.
Izoh (0)