Baring Vostok инвестиция компанияси асосчиси, АҚШ фуқароси Майкл Калви «Восточний экспресс» банкидан 2,5 миллиард рубль ўғирлашда гумон қилиниб, қўлга олингани ҳақида хабар берилганди.
Meduza нашрига кўра, Калви назорати остидаги яна бир компания — Биринчи коллекторлик бюросининг банкдан шунча миқдорда қарзи бўлган. У кредитни қайтариш ўрнига 2017 йил февралида банкка IFTG компанияси акцияларини беради ва улар 3 миллиард рубль туришини айтади.
Жорий йил февралида банк директорлар кенгаши аъзоси Шерзод Юсупов Россия ФХХга келиб, Калви ва келишувнинг бошқа иштирокчилари уни алдаганидан шикоят қилади. ФХХ аудиторлик баҳосига таяниб, ушбу акциялар чиндан ҳам 3 миллиард эмас, 600 минг рубль туришини тасдиқлайди ва Калви ҳамда унинг шерикларини фирибгарликда айблайди.
Майкл Калвининг таъкидлашича, 2017 йил февралидаги битим чоғида Юсуповни ҳеч ким алдамаган, у IFTG компанияси акцияларига доир барча маълумотлар билан таниш бўлган.
Маълумот учун, Шерзод Юсупов ўзбекистонлик бўлиб, 1981 йилда Урганчда туғилган. Россиядаги «Восточний» ва «Модульбанк» эгаларидан бири ҳамда директорлар кенгаши аъзоси. У «Buyuk Kelajak» халқаро нодавлат нотижорат ташкилоти иштирокчиси ҳисобланади.
Изоҳ (0)