Payariqda “Jamoatchilik nazorati” yakunlariga ko‘ra 12 nafar rahbarga chora ko‘rish belgilandi

Payariqda viloyat hokimi Ekrinjon Turdimov rahbarligida jamoatchilik nazorati guruhining faoliyati yakunlari ko‘rib chiqildi, deb xabar berdi “Zarnews”.

Nazorat guruhlari tomonidan tumanda mavjud 65 mahallada 4300 dan ziyod kamchilik va muammolar aniqlangan. Shundan 917 tasi ijobiy hal etilgan, 1199 murojaat qaytadan ijroga yo‘naltirilgan. Tuman tibbiyot birlashmasiga 195 ta, tuman bandlikka ko‘maklashish markaziga 115 ta, maktabgacha ta’lim bo‘limiga 56 ta, tuman IIBga 87 ta, tuman gazlashtirish idorasiga kelgan 1098 ta murojaatda bayon etilgan muammolarga yechim topilmagan.

Yig‘ilishda aholi muammolarini ijro idoralariga yetkazishga mas’ul bo‘lgan mahalla oqsoqollari faoliyati ham tahlil etilgan.

Shuningdek, ijro va mehnat intizomi masalalarida o‘zboshimchalikka, sansolarlikka yo‘l qo‘yganligi uchun tumanning 12 nafar rahbariga nisbatan ma’muriy javobgarlik masalasini ko‘rish tavsiya etilgan.

Yig‘ilish yakunida tuman hokimligi, sektorlar va mutasaddi idora rahbarlari zimmasiga jamoatchilik nazorati guruhlari tomonidan aniqlangan kamchilik va muammolarni qisqa muddatda bartaraf etish choralari belgilangan.