Shanxay hamkorlik tashkiloti Bosh kotibi Vladimir Norov Qirg‘izistonning Xitoydagi Favqulodda va muxtor elchisi Kanayim Baktigulova bilan uchrashdi, deb xabar beradi O‘zA.
ShHT matbuot xizmati xabarida keltirilishicha, unda Vladimir Norov Qirg‘iziston Respublikasi boshchiligida amalga oshiriladigan tadbirlar, xususan, ShHTning Bishkek sammitini muvaffaqiyatli o‘tkazish tashkilotning hozirgi kundagi dolzarb masalalaridan biri ekanini ta’kidlagan.
– Kotibiyat sammit doirasidagi barcha loyihalar va tashabbuslarni amalga oshirishda Qirg‘iziston bilan hamkorlik qilishga tayyor, – deydi Vladimir Norov Kanayim Baktigulovaga shartnoma loyihalarining yangi ro‘yxatini taqdim etish jarayonida.
Bundan tashqari, Bosh kotib ShHTga a’zo davlatlar o‘rtasida savdo-iqtisodiy hamkorlikni kuchaytirish, kotibiyat faoliyatini tahliliy ko‘rib chiqish va sammitni o‘tkazish jarayonlarida maslahat kengashini tuzish yuzasidan ma’lumotlar berdi.
Elchi Kanayim Baktigulova Vladimir Norovning Bishkek sammitini muvaffaqiyatli o‘tkazish, hujjatlarni muvofiqlashtirish va targ‘ibot ishlaridagi faoliyatini alohida e’tirof etib, unga minnatdorlik bildirdi.
Shuningdek, elchi sammitni o‘tkazishda Qirg‘iziston hukumati tomonidan olib borilayotgan tayyorgarlik ishlari yuzasidan ma’lumotlar berib o‘tdi.
Samimiy va do‘stona muhitda o‘tgan uchrashuvda kun tartibidagi qator masalalar muhokama qilindi.
Izoh (0)