Andijon davlat universitetida viloyat adliya boshqarmasining 2018-yil yakunlariga bag‘ishlangan Hay’at majlisi bo‘lib o‘tdi. Bu haqda boshqarma huquqiy targ‘ibot va ma’rifat bo‘limiga asoslanib jurnalist Umidjon Mamarasulov xabar bermoqda.
Huquqiy targ‘ibot va ma’rifat bo‘limi mudiri Kamoliddin Jaloliddinovning ma’lum qilishicha, boshqarma boshlig‘i Abdumutal Dadajonov olib borgan majlisda boshqarma markaziy apparati tarkibiy bo‘linmalari, shahar va tuman adliya bo‘limlari rahbar va xodimlari, davlat notarial idoralari notariuslari ishtirok etdi.
Tanqidiy ruhda o‘tgan hay’at majlisida o‘tgan yilda adliya organlari va muassasalari tomonidan amalga oshirilgani ishlar tahlil etildi.
Xususan, norma ijodkorligi va huquqni qo‘llash amaliyoti sohasida viloyatdagi mahalliy davlat hokimiyati organlarining 39 ta qaror loyihalari huquqiy ekspertizadan o‘tkazilib, shundan 34 tasi davlat hisobiga olingan.
Yil davomida jismoniy va yuridik shaxslardan jami 2 ming 499 ta murojaat qabul qilingan bo‘lib, uning 2 ming 113 tasi qonuniy hal etilgan.
Shuningdek, boshqarma va bo‘limlar tomonidan viloyat bo‘yicha 600 dan ortiq (2017-yilda 290 ta) tashkilotlarda huquqni qo‘llash amaliyoti o‘rganilgan bo‘lib, 120 mingdan ortiq qonunbuzilishlar aniqlangan. Natijada 686 ta taqdimnoma, sudlarga 1,5 milliard so‘mlik 652 ta da’vo arizalari, 3 ming 768 ta ogohnoma, 117 ta (2017-yilda 87 ta) ma’muriy va 15 ta jinoiy takliflar kiritilgan.
Qo‘llanilgan ta’sir choralar natijasida 1,4 milliard so‘mlik 538 ta da’vo arizalari qanoatlantirilgan. Shuningdek, 427 nafar mansabdor shaxs intizomiy, 127 nafari ma’muriy javobgarlikka tortilgan, 25 nafar mansabdor shaxs bilan esa tuzilgan mehnat shartnomalari bekor qilingan.
2018-yilda Davlat notarial idoralari tomonidan qariyb 52 milliard so‘mdan ziyod davlat boji, 933 million so‘mlik pullik xizmat va 2 milliard so‘m gerb yig‘imlari undirilishiga erishilgan.
Hay’at yig‘ilishida, shuningdek, adliya boshqarmasi va uning tizimida sohalar faoliyatida yo‘l qo‘yilgan tizimli xato va kamchiliklar ham aytilib, ularni bartaraf etish bo‘yicha ishlarga ham to‘xtalib o‘tildi. Jumladan, xalq bilan to‘g‘ridan to‘g‘ri muloqot qilish, fuqarolar murojaatlari bilan ishlashda hanuzgacha kamchiliklar saqlanib qolayotgani, murojaatlarda keltirilgan vajlarni yetarli o‘rganilmayotgani ta’kidlandi.
Hisobotda faoliyatida yo‘l qo‘yilgan xato va kamchiliklar uchun 22 nafar davlat notarial idora xodimlari, 7 nafar markaziy apparat hamda 1 nafar adliya bo‘limi xodimiga nisbatan intizomiy choralar qo‘llanilgani ta’kidlandi.
Izoh (0)