Shahrisabzda O‘zbekistonda xizmat ko‘rsatgan madaniyat xodimi, “El-yurt hurmati” hamda “Fidokorona xizmatlari uchun” ordenlari sohibi, milliy maqom ustasi Elmurod Boymurodovga 70 yoshlik yubileyi munosabati bilan Prezident sovg‘asi — yangi xonadon kaliti topshirildi. Bu haqda O‘zA xabar bermoqda.
Shu munosabat bilan tashkil etilgan tadbirda madaniyat va san’at sohasi vakillari, ijodkorning shogirdlari, do‘stlari, sohaga aloqador tashkilotlar vakillari, OAV xodimlari ishtirok etdi.
Elmurod Boymurodov 1949-yilda Shahrisabz tumanining Miraki qishlog‘ida tug‘ilgan. O‘rta maktabni bitirgach, Toshkent davlat teatr va rassomlik institutida tahsil oldi. 1971-yilda institutning rejissyorlik bo‘limini tamomlab, Qori Zokir Sodiqov nomidagi Shahrisabz shahar xalq teatriga ishga keldi. 2014-yilga qadar, ya’ni 43 yil davomida ana shu teatrda rejissyor bo‘lib ishladi. U teatrda rejissyorlik ishi bilan birga, 1972-yildayoq Shahrisabzda maqom ansamblini tashkil etdi. Ansambl faoliyatiga yosh iste’dodlarni jalb etib, ularga maqom sirlarini o‘rgatib keldi.
Prezident Shavkat Mirziyoyev tashabbusi bilan aynan Shahrisabzda xalqaro maqom san’ati anjumaniga asos solinishida Elmurod Boymurodovning ham xizmati bor.
— Bugungi e’tirofdan ko‘nglim tog‘dek ko‘tarildi. San’atning nonini yeyish oson emas, ayniqsa, maqom yo‘nalishida. Keyingi yillarda milliy maqom san’atini rivojlantirish borasida ko‘plab xayrli ishlar amalga oshirilayotgani, san’at ahliga imkoniyat va imtiyozlar, shart-sharoitlar yaratilayotgani tahsinga loyiq, — deydi Elmurod Boymurodov.
Izoh (0)