Pokiston politsiyasi terrorchilarga qarshi kurash bahonasida bir oilani otib o‘ldirdi

Pokiston hukumati terrorizmga qarshi kurash bo‘limining o‘ndan ortiq xodimini hibsga oldi, deb yozadi South China Morning Post.

Hibsga olingan politsiyachilar begunoh oilani otib o‘ldirganlikda gumonlanmoqda. Hodisa 19-yanvar kuni yuz berdi.

Politsiyachilar mashinani to‘xtatib, uning ichidagi to‘rt kishi — oziq-ovqat do‘koni egasi, uning rafiqasi, 13 yoshli qizi va ruldagi oilaning do‘stini otib tashladi.

Politsiyachilar mashinani tekshirish uchun to‘xtatgani, shunda yo‘lovchilar ularga qarata o‘q uzganini iddao qilgan. Ular o‘tgan safargi operatsiyadan so‘ng olingan razvedka ma’lumotlari asosida harakat qilganini aytib o‘tgan.

Politsiyachilar faqatgina avtomobil haydovchisini qidiruvdagi terrorist ekanligini aytib, uni qolganlardan tirik nishon sifatida foydalanganlikda ayblagan.

Oilaning do‘stlari va hodisa guvohlari esa voqeani boshqacha talqin qilmoqda.

Ularning aytishicha, politsiyachilar o‘z mashinasida oila ketayotgan mashinaning orqasiga borib urib, uni to‘xtatgan.

Keyin ular mashina ichidagi kishilarni sovuqqonlik bilan otib tashlagan. Otib tashlashdan oldin esa mashinadan uch nafar yosh bolani tushirishgan.

Shuningdek, hodisa joyidan politsiyachilarga qarata o‘q uzilishi mumkin bo‘lgan hech qanday qurol topilmagan.  Guvohlarning so‘zlarini tasdiqlovchi videoyozuv ham bor.

Halok bo‘lgan do‘kon egasining o‘g‘li o‘sha paytda oila to‘yga ketayotganini so‘zlab bergan.

Marhumlar yashagan Laxor shahrida ushbu hodisadan so‘ng ommaviy norozilik namoyishlari o‘tkazildi, hatto namoyishchilar o‘ldirilgan fuqarolarning jaadini yo‘lning o‘rtasiga qo‘yib qo‘yishdi.

Mamlakat hukumati hodisa yuzasidan surishtiruv boshlanganini ma’lum qilgan.

Hozirda terrorizmga qarshi kurashish bo‘limining hodisaga aloqadorlikda gumonlanayotgan 16 nafar xodimini hibsga olgan.

Pokiston bosh vaziri Imron Xon hodisa yuzasidan tegishli chora ko‘rishga va’da bergan.