Покистон полицияси террорчиларга қарши кураш баҳонасида бир оилани отиб ўлдирди

Покистон ҳукумати терроризмга қарши кураш бўлимининг ўндан ортиқ ходимини ҳибсга олди, деб ёзади South China Morning Post.

Ҳибсга олинган полициячилар бегуноҳ оилани отиб ўлдирганликда гумонланмоқда. Ҳодиса 19 январь куни юз берди.

Полициячилар машинани тўхтатиб, унинг ичидаги тўрт киши — озиқ-овқат дўкони эгаси, унинг рафиқаси, 13 ёшли қизи ва рулдаги оиланинг дўстини отиб ташлади.

Полициячилар машинани текшириш учун тўхтатгани, шунда йўловчилар уларга қарата ўқ узганини иддао қилган. Улар ўтган сафарги операциядан сўнг олинган разведка маълумотлари асосида ҳаракат қилганини айтиб ўтган.

Полициячилар фақатгина автомобиль ҳайдовчисини қидирувдаги террорист эканлигини айтиб, уни қолганлардан тирик нишон сифатида фойдаланганликда айблаган.

Оиланинг дўстлари ва ҳодиса гувоҳлари эса воқеани бошқача талқин қилмоқда.

Уларнинг айтишича, полициячилар ўз машинасида оила кетаётган машинанинг орқасига бориб уриб, уни тўхтатган.

Кейин улар машина ичидаги кишиларни совуққонлик билан отиб ташлаган. Отиб ташлашдан олдин эса машинадан уч нафар ёш болани туширишган.

Шунингдек, ҳодиса жойидан полициячиларга қарата ўқ узилиши мумкин бўлган ҳеч қандай қурол топилмаган.  Гувоҳларнинг сўзларини тасдиқловчи видеоёзув ҳам бор.

Ҳалок бўлган дўкон эгасининг ўғли ўша пайтда оила тўйга кетаётганини сўзлаб берган.

Марҳумлар яшаган Лахор шаҳрида ушбу ҳодисадан сўнг оммавий норозилик намойишлари ўтказилди, ҳатто намойишчилар ўлдирилган фуқароларнинг жаадини йўлнинг ўртасига қўйиб қўйишди.

Мамлакат ҳукумати ҳодиса юзасидан суриштирув бошланганини маълум қилган.

Ҳозирда терроризмга қарши курашиш бўлимининг ҳодисага алоқадорликда гумонланаётган 16 нафар ходимини ҳибсга олган.

Покистон бош вазири Имрон Хон ҳодиса юзасидан тегишли чора кўришга ваъда берган.