2018-yil yanvar—dekabr oylari yakuni bo‘yicha O‘zbekistonda ko‘rsatilgan xizmatlar hajmi 146,8 trillion so‘mdan oshdi. 2017-yilga nisbatan o‘sish sur’ati 108,4 foizni tashkil etdi. Bu haqda O‘zA xabar berdi.
Ko‘rsatilgan xizmatlar hajmining o‘sishiga ta’sir ko‘rsatgan asosiy omillar moliyaviy xizmatlar hajmining 25,8, transport xizmatlarining 3,9, savdo xizmatlarining 4,2, aloqa va axborotlashtirish xizmatlarining 15,6 foizga o‘sishi bo‘ldi.
— Turli xildagi xizmatlarga bo‘lgan talabning oshishini bir qator omillarning ta’siri bilan izohlash mumkin, — deydi Davlat statistika qo‘mitasining Xizmatlar sohasi statistikasi boshqarmasi boshlig‘i Qobil Berdiqulov. — Misol uchun, farovonlikning oshishi natijasida yig‘ishtirish, tozalash, ovqat tayyorlash kabi ishlarni yengillashtirishga bo‘lgan istak paydo bo‘lib, qulay xizmatlar sanoati rivojlanadi. Yoki daromadlarning oshishi va qo‘shimcha bo‘sh vaqtning paydo bo‘lishi dam olish va sport bilan shug‘ullanish kabi qator xizmatlarga bo‘lgan talabni oshirdi. Shaxsiy kopyuterlar, multimediyali audio va video uskunalari, xavfsizlik tizimlaridan foydalanishning o‘sishi ularni o‘rnatuvchi va texnik xizmat ko‘rsatuvchi mutaxassislarga bo‘lgan talabni ko‘paytiradi.
Buni 2018-yildagi xizmatlar sohasidagi ko‘rsatkichlarda ham kuzatish mumkin. Misol uchun, moliyaviy xizmatlarning o‘sish sur’ati 125 foizdan oshgan. Buni tijorat banklari va boshqa moliyaviy tashkilotlar tomonidan ko‘rsatilayotgan xizmatlarning ham sifat va hajm jihatdan kengayib borayotgani, istiqbolli investitsiya loyihalarini kreditlash ko‘lamining kengaygani, kredit berish turlarining ko‘paygani hamda banklar tomonidan innovatsion xizmatlar ko‘rsatish joriy etilayotgani bilan izohlash mumkin.
Shuningdek, transport va savdo sohasidagi xizmatlar ham nisbatan yaxshilangan. Bunga sabab, aholining daromadlari darajasining oshishi bilan iste’mol talabi va savdo aylanmasi o‘smoqda.Ayni vaqtda 21 milliondan ortiq aholi mobil xizmatidan foydalanishi hisobiga, aloqa va axborotlashtirish xizmatlariga bo‘lgan talab ham ortmoqda.
Ma’lumot uchun, 2018-yilda eng yuqori o‘sish sur’ati (128,9 foiz) me’morchilik, muhandislik izlanishlari, texnik sinovlar va tahlil sohasida qayd etildi: mamlakatda o‘tgan yili uy-joylar va bino-inshootlar qurish ishlari jadal olib borildi.
Izoh (0)