2018 йил январь—декабрь ойлари якуни бўйича Ўзбекистонда кўрсатилган хизматлар ҳажми 146,8 триллион сўмдан ошди. 2017 йилга нисбатан ўсиш суръати 108,4 фоизни ташкил этди. Бу ҳақда ЎзА хабар берди.
Кўрсатилган хизматлар ҳажмининг ўсишига таъсир кўрсатган асосий омиллар молиявий хизматлар ҳажмининг 25,8, транспорт хизматларининг 3,9, савдо хизматларининг 4,2, алоқа ва ахборотлаштириш хизматларининг 15,6 фоизга ўсиши бўлди.
— Турли хилдаги хизматларга бўлган талабнинг ошишини бир қатор омилларнинг таъсири билан изоҳлаш мумкин, — дейди Давлат статистика қўмитасининг Хизматлар соҳаси статистикаси бошқармаси бошлиғи Қобил Бердиқулов. — Мисол учун, фаровонликнинг ошиши натижасида йиғиштириш, тозалаш, овқат тайёрлаш каби ишларни енгиллаштиришга бўлган истак пайдо бўлиб, қулай хизматлар саноати ривожланади. Ёки даромадларнинг ошиши ва қўшимча бўш вақтнинг пайдо бўлиши дам олиш ва спорт билан шуғулланиш каби қатор хизматларга бўлган талабни оширди. Шахсий копютерлар, мультимедияли аудио ва видео ускуналари, хавфсизлик тизимларидан фойдаланишнинг ўсиши уларни ўрнатувчи ва техник хизмат кўрсатувчи мутахассисларга бўлган талабни кўпайтиради.
Буни 2018 йилдаги хизматлар соҳасидаги кўрсаткичларда ҳам кузатиш мумкин. Мисол учун, молиявий хизматларнинг ўсиш суръати 125 фоиздан ошган. Буни тижорат банклари ва бошқа молиявий ташкилотлар томонидан кўрсатилаётган хизматларнинг ҳам сифат ва ҳажм жиҳатдан кенгайиб бораётгани, истиқболли инвестиция лойиҳаларини кредитлаш кўламининг кенгайгани, кредит бериш турларининг кўпайгани ҳамда банклар томонидан инновацион хизматлар кўрсатиш жорий этилаётгани билан изоҳлаш мумкин.
Шунингдек, транспорт ва савдо соҳасидаги хизматлар ҳам нисбатан яхшиланган. Бунга сабаб, аҳолининг даромадлари даражасининг ошиши билан истеъмол талаби ва савдо айланмаси ўсмоқда.Айни вақтда 21 миллиондан ортиқ аҳоли мобил хизматидан фойдаланиши ҳисобига, алоқа ва ахборотлаштириш хизматларига бўлган талаб ҳам ортмоқда.
Маълумот учун, 2018 йилда энг юқори ўсиш суръати (128,9 фоиз) меъморчилик, муҳандислик изланишлари, техник синовлар ва таҳлил соҳасида қайд этилди: мамлакатда ўтган йили уй-жойлар ва бино-иншоотлар қуриш ишлари жадал олиб борилди.
Изоҳ (0)