15-yanvar kuni Toshkent shahridagi Inha universitetida Koreya ixtirochi ayollar assotsiatsiyasi (KWIA) prezidenti Yun Mung Xi bilan O‘zbekiston intellektual mulk agentligi bosh direktori Alisher Fayzullayev, Xotin-qizlar qo‘mitasi vakillari va yetakchi ekspertlari uchrashuvi bo‘lib o‘tdi. Bu haqda universitet matbuot xizmati xabar berdi.
Ushbu tashrifdan maqsad Janubiy Koreya va O‘zbekiston o‘rtasida bilim va tajriba almashishdir.
Shuningdek, “Ixtirochi ayollar – fan, innovatsiya, investitsiya” mavzusidagi davra suhbati doirasida O‘zbekiston Ixtirochi ayollar markazi va Koreya ixtirochi ayollar assotsiatsiyasi o‘rtasida o‘zaro anglashuv memorandumi imzolandi. Ushbu hujjat ikki tomonlama ixtirochilik, ta’lim, biznes hamda madaniy aloqalarni rivojlantirishga, mamlakat olima, tadbirkor va mutaxassis ayollari erishayotgan yutuqlarini xalqaro darajaga olib chiqishga xizmat qiladi.
Ta’kidlash joizki, Toshkent shahridagi Inha universiteti xalqaro tashkilotlar bilan hamkorlikda har yili xotin-qizlarni qo‘llab-quvvatlash hamda ularni ushbu sohada ijodiy salohiyatini yuzaga chiqarish maqsadida AT sohasida tanlovlar va tadbirlar o‘tkazib kelmoqda.
Bugungi kunda O‘zbekiston Xotin-qizlar qo‘mitasi IUT bilan birgalikda qo‘shma loyihalarni tashkil qilmoqda, bu xotin-qizlarga grant dasturlarida ishtirok etishga imkoniyat yaratadi. Qayd etish lozimki, Koreya ixtirochi ayollar assotsiatsiyasi (KWIA) jamiyatda obro‘sini ko‘tarish, yangiliklar yaratishga xizmat qiladi va ularni patentlashga imkon beradi.
Izoh (0)