O‘zbekiston Prezidentining 2019-yil 3-yanvardagi “Jizzax viloyatini kompleks rivojlantirishni davlat tomonidan tartibga solish va boshqarishning samarali modelini ishlab chiqish to‘g‘risida”gi farmoni hududlarni ijtimoiy-iqtisodiy rivojlantirish, aholi turmush darajasi va sifatini oshirish yo‘lida ko‘rsatilayotgan doimiy e’tiborning yana bir amaliy ifodasi bo‘ldi, deb yozmoqda O‘zA.
Farmonda 2019-yil 1-martdan boshlab “Ilg‘or hudud” sinov loyihasi doirasida normativ-huquqiy bazani takomillashtirish, davlat tomonidan tartibga solish va boshqarish sohasini tahlil qilish va baholash, hududni jadal rivojlantirish uchun ilg‘or qarorlarni aniqlash belgilangan. Shuningdek, respublika va hududiy ijro hokimiyati organlarining javobgarlik sohasini aniqlashtirish, hududning strategik maqsadlari, shuningdek, hududiy davlat boshqaruvi organlari uchun maqsadli ko‘rsatkichlarni shakllantirish mexanizmlarini ishlab chiqish ko‘zda tutilgan.
Boshqaruv tizimida bunday yangi usulning qo‘llanishi hudud aholisining yashash sharoitini yaxshilash va daromadini oshirish, tarkibiy islohotlar yordamida investitsiyaviy muhitni yaxshilash, talab yuqori bo‘lgan mahsulotlar ishlab chiqarish uchun shart-sharoit yaratish, iqtisodiy faoliyatni rag‘batlantirish va sanoatning yangi tarmoqlarini rivojlantirish, mahsulot va xizmatlar raqobatbardoshligini oshirishga olib keladi.
Prezident tashabbusi bilan ishlab chiqilgan “2017—2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha harakatlar strategiyasi” dasturi doirasida viloyatda ijtimoiy-iqtisodiy islohotlar izchil amalga oshirilmoqda. Jumladan, 2018-yil — “Faol tadbirkorlik, innovatsion g‘oyalar va texnologiyalarni qo‘llab-quvvatlash yili”da kichik biznes va xususiy tadbirkorlik subyektlariga yaratilayotgan imkoniyatlardan unumli foydalanish iqtisodiy o‘sishning yuqori sur’atlarini ta’minlash omili bo‘ldi.
Viloyatda 2018-yilda yalpi hududiy mahsulot hajmi 7 trillion 138 milliard so‘m, o‘sish sur’ati 105 foizni tashkil etdi. Sanoat mahsulotlari ishlab chiqarish 102,1 foizga, qurilish ishlari hajmi 104,4 foizga, qishloq xo‘jaligi mahsulotlari 102 foizga, chakana savdo aylanmasi 107,4 hamda jami xizmatlar hajmi 113,3 foizga yetdi.
Viloyat yalpi hududiy mahsulot tarkibida qishloq xo‘jaligining ulushi yuqoriligi inobatga olinib, sanoat ulushini ko‘paytirish hisobiga uni diversifikatsiya qilish talab etiladi. Amalga oshiriladigan islohotlar natijasida 2019-yilda yalpi hududiy mahsulotda sanoatning ulushini 17,5 foizga yetkazish ko‘zda tutilmoqda.
O‘tgan yili viloyatda 43 ta yangi qo‘shma va xorijiy korxonalar ro‘yxatdan o‘tkazilib, faoliyat ko‘rsatayotgan bunday korxonalar soni 120 taga yetdi. Kichik biznes va xususiy tadbirkorlikni har tomonlama qo‘llab-quvvatlash va rag‘batlantirish, ularning faoliyati uchun qulay muhit yaratish borasida amalga oshirilgan tadbirlar natijasida 1804 ta kichik biznes subyekti tashkil etildi. Bu ko‘rsatkich 2017-yilga nisbatan 21,7 foizga ko‘pdir.
Tadbirkorlikni qo‘llab-quvvatlash borasida amalga oshirilgan ishlar natijasida 2018-yilda 10 million 113 ming dollarlik sanoat va 34 million 504 ming dollarlik meva-sabzavot mahsulotlari, jami 44 million 620 ming dollarlik mahsulot eksport qilindi. Natijada eksport hajmi 2017-yilga nisbatan 9,5 million dollarga yoki 127 foizga ortdi.
O‘tgan yili erishilgan bu natijalar Prezidentzning “Jizzax viloyatini kompleks rivojlantirishni davlat tomonidan tartibga solish va boshqarishning samarali modelini ishlab chiqish to‘g‘risida”gi farmonida belgilab berilgan “Ilg‘or hudud” sinov loyihasini amalga oshirishga zamin bo‘lib xizmat qiladi.
Izoh (0)