Angrenda issiqlik ta’minoti o‘ta qoniqarsiz bo‘lgani uchun aholi o‘rtasida kasalliklar ko‘paymoqda

Angren shahri issiqlik tarmoqlari quvurlari eskirgani sababli aholi xonadonlari hamda tashkilotlarning issiqlik ta’minoti yetarli darajada bo‘lmayapti. Bu haqda “Xalq so‘zi” xabar berdi.

Shahardagi 980 ta ko‘p qavatli uydan 634 tasi markazlashgan issiqlik ta’minotiga ulangan. Ammo yetkazib berilayotgan issiq suvning harorati belgilangan me’yordan juda past bo‘lgani bois aholi, ayniqsa, bolalar o‘rtasida turli kasalliklar ko‘paygan. Qolgan 346 ta ko‘p qavatli uy umuman tarmoqqa ulanmagan. Natijada aholi xonadonlarni o‘z imkonidan kelib chiqib isitishga majbur bo‘lyapti.

Muammoning sabablari va uni hal etish yo‘llari tahlili xalq deputatlari Angren shahar kyengashi sessiyasida muhokama qilindi. Hududlardagi ijtimoiy-iqtisodiy ahvolni va aholini qiynab kelayotgan muammolarni o‘rganish bo‘yicha Respublika ishchi guruhi tomonidan hududda o‘tkazilgan o‘rganish natijalari o‘rtaga tashlandi.

Vaziyatni o‘zgartirish uchun issiqlik ta’minotining markazlashgan tizimidan bosqichma-bosqich voz kechib, zamonaviy lokal texnologiyalarga o‘tish lozim. Buning uchun esa katta mablag‘ talab etiladi. Sessiyada bu masalani joriy yilgi hududni ijtimoiy-iqtisodiy rivojlantirish va investitsiya dasturlariga kiritish zarurligi taklif qilindi.

Yana bir og‘riqli masala — shahardagi ekologik holat, ayniqsa, atmosfera havosining ifloslanishi bilan bog‘liq. “Angren IES” AJ minoralaridan chiqayotgan tutunsifat kul-qurum chiqindilari shahar ustiga yog‘ilib, aholi salomatligiga zarar yetkazyapti. Natijada odamlar orasida bir qator kasalliklarni keltirib chiqarmoqda. Ayniqsa, inshoot yaqinida joylashgan Gurum mahallasi ahli yuzaga kelgan holatdan juda ko‘p aziyat chekmoqda.

Issiqlik stansiyasidagi mavjud elektr filtrlar qayta-qayta joriy ta’mirlanishi va hozirgi kunda yaroqsiz holga kelgani muammoga sabab bo‘lyapti. Yig‘ilishda inshoot rahbariyati korxonada atrof-muhitga yetkazilayotgan zararni bartaraf etish choralarini zudlik bilan ko‘rishi, shu jumladan, tegishli modernizatsiyalash ishlarini olib borishi zarurligi aytib o‘tildi.

Muhokama etilgan masalalar yuzasidan tegishli qaror qabul qilindi.