Xalq ta’limi tizimida islohotlarni amalga oshirish doirasida Xalq ta’limi vazirligi rahbariyati joylardagi vaziyatlarni o‘rganmoqda va aniqlangan kamchiliklarni bartaraf etish uchun kerakli choralar ko‘rmoqda, deb xabar beradi vazirlik axborot xizmati.
Xususan, tizimdagi islohotlarni amalga oshirish doirasida Xalq ta’limi vazirligi rahbariyati Qashqadaryo viloyatida joylardagi vaziyatlarni o‘rganib, aniqlangan kamchiliklarni bartaraf etmoqda.
Ishchi guruh tomonidan viloyatdagi 20 dan ziyod ta’lim muassasalarida kuzatuv ishlari olib borildi. Tekshiruv jarayonida Qashqadaryo viloyatidagi ta’lim muassasalari uchun 2018-yil davomida 101,4 milliard so‘m mablag‘ sarflanib, jami 80 ta maktabda qurilish-ta’mirlash ishlari olib borilgani aniqlandi. Bu esa so‘nggi ikki yil, ya’ni 2016—2017-yillarga nisbatan bajarilgan qurilish ta’mirlash ishlariga sarflangan mablag‘dan 1,1 barobar ko‘pdir.
Bundan tashqari, 2018-yil davomida viloyatdagi 200 dan ortiq maktabda isitish tizimlari yangilandi va qo‘lbola “burjuyka” pechlari, ma’naviy eskirgan, yaroqsiz qozonlari yangi zamonaviylariga almashtirildi.
Shunga qaramasdan, viloyatda o‘z yechimini kutib turgan masalalar hali talay. Misol uchun, Mirishkor tumani “Vori” QFYda joylashgan 17-maktab o‘rganilganda, ushbu hudud 10 yil avval tabiiy gazdan uzilganligi sabab, undagi 6 ta tabiiy gazga mo‘ljallangan isitish qozonlaridan foydalanish imkoni yo‘qligi aniqlangan. Ishchi guruh sa’y-harakati bilan qo‘lbola pechlar orqali isitiladigan maktabga jamg‘arilgan 10 tonna ko‘mir briketi zaxirasiga qo‘shimcha 16,5 tonna ko‘mir yetkazib berildi. Shu bilan birga bir hafta muddatda 6 dona qattiq yonilg‘iga mo‘ljallangan yangi qozonlar o‘rnatilib, foydalanishga topshirildi.
Yakkabog‘ tumanidagi 13-maktabning 3 ta sinfxonasidagi hamda 25-maktabning sinfxonalaridagi eskirgan jihozlari Yakkabog‘ Agro biznes kasb-hunar kollejining bo‘sh turgan yaroqli jihozlariga almashtirildi.
Bugungi kunga qadar ham Qashqadaryo viloyatidagi 300 dan ortiq maktabning isitish tizimini modernizatsiya etish lozim. Ushbu masalaga yechim topish uchun Xalq ta’limi vazirligi tomonidan maktablarni isitishning xorijiy tajribalarini o‘rgangan holda ularni butunlay yangi energiya tejamkor isitish tizimiga almashtirish hamda mazkur muammolarni bartaraf etish uchun ishlar olib borilmoqda.
Izoh (0)