Халқ таълими вазирлиги томонидан Қашқадарё вилоятидаги мактаблар ҳолати яхшиланмоқда

Халқ таълими тизимида ислоҳотларни амалга ошириш доирасида Халқ таълими вазирлиги раҳбарияти жойлардаги вазиятларни ўрганмоқда ва аниқланган камчиликларни бартараф этиш учун керакли чоралар кўрмоқда, деб хабар беради вазирлик ахборот хизмати.

Хусусан, тизимдаги ислоҳотларни амалга ошириш доирасида Халқ таълими вазирлиги раҳбарияти Қашқадарё вилоятида жойлардаги вазиятларни ўрганиб, аниқланган камчиликларни бартараф этмоқда.

Ишчи гуруҳ томонидан вилоятдаги 20 дан зиёд таълим муассасаларида кузатув ишлари олиб борилди. Текширув жараёнида Қашқадарё вилоятидаги таълим муассасалари учун 2018 йил давомида 101,4 миллиард сўм маблағ сарфланиб, жами 80 та мактабда қурилиш-таъмирлаш ишлари олиб борилгани аниқланди. Бу эса сўнгги икки йил, яъни 2016—2017 йилларга нисбатан бажарилган қурилиш таъмирлаш ишларига сарфланган маблағдан 1,1 баробар кўпдир.

Бундан ташқари, 2018 йил давомида вилоятдаги 200 дан ортиқ мактабда иситиш тизимлари янгиланди ва қўлбола «буржуйка» печлари, маънавий эскирган, яроқсиз қозонлари янги замонавийларига алмаштирилди.

Шунга қарамасдан, вилоятда ўз ечимини кутиб турган масалалар ҳали талай. Мисол учун, Миришкор тумани «Вори» ҚФЙда жойлашган 17-мактаб ўрганилганда, ушбу ҳудуд 10 йил аввал табиий газдан узилганлиги сабаб, ундаги 6 та табиий газга мўлжалланган иситиш қозонларидан фойдаланиш имкони йўқлиги аниқланган. Ишчи гуруҳ саъй-ҳаракати билан қўлбола печлар орқали иситиладиган мактабга жамғарилган 10 тонна кўмир брикети захирасига қўшимча 16,5 тонна кўмир етказиб берилди. Шу билан бирга бир ҳафта муддатда 6 дона қаттиқ ёнилғига мўлжалланган янги қозонлар ўрнатилиб, фойдаланишга топширилди.

Яккабоғ туманидаги 13-мактабнинг 3 та синфхонасидаги ҳамда 25-мактабнинг синфхоналаридаги эскирган жиҳозлари Яккабоғ Агро бизнес касб-ҳунар коллежининг бўш турган яроқли жиҳозларига алмаштирилди.

Бугунги кунга қадар ҳам Қашқадарё вилоятидаги 300 дан ортиқ мактабнинг иситиш тизимини модернизация этиш лозим. Ушбу масалага ечим топиш учун Халқ таълими вазирлиги томонидан мактабларни иситишнинг хорижий тажрибаларини ўрганган ҳолда уларни бутунлай янги энергия тежамкор иситиш тизимига алмаштириш ҳамда мазкур муаммоларни бартараф этиш учун ишлар олиб борилмоқда.