Xalqaro press klubning investitsiya masalalariga bag‘ishlangan sessiyasida spiker sifatida ishtirok etgan “O‘ztransgaz” AJ ning yangi rahbari Bahodir Eshmurodov is gazidan zaharlanish bilan bog‘liq fojialar ko‘payib borayotganiga munosabat bildirdi, deb xabar berdi “Daryo” muxbiri Sevara Nishonova.
Bahodir Eshmurodov O‘zbekiston qo‘shni davlatlardan gaz sotib olmayotgani, shunchaki gazni iste’molchilarga yetkazib berishda qo‘shni davlatlar quvurlaridan foydalanayotganini qayd etib o‘tdi:
“Biz qo‘shni davlatlardan gaz sotib olayotganimiz yo‘q, bu o‘zimizning gazimiz. Qo‘shnilar bilan yo‘lga qo‘ygan munosabatlarimizdan unumli foydalanish maqsadida biz qo‘shni davlatlar gazotransport tizimidan foydalanyapmiz, xolos. Bizning ikkita katta gaz omborimiz bor. Biri Andijon viloyati Xo‘jaobod gaz ombori, ikkinchisi Buxoro viloyatida joylashgan Gazli gaz ombori. Gazlidagi omborimiz ancha katta, shuning uchun biz u yerdagi gazni qo‘shni davlat quvurlaridan foydalangan holda to‘g‘ridan to‘g‘ri Toshkent va Toshkent orqali vodiyga yetkazib berish masalasini o‘rganib chiqdik. Va biz ushbu maqsadni mana shu marshrut orqali amalga oshirdik”.
Shuningdek, “O‘ztransgaz” AJ raisi chekka hududlar aholisi nima sababdan tabiiy gazdan uzilib, suyultirilgan gazga o‘tkazilgani haqida quyidagilarni ma’lum qildi:
“Ikkinchi masala, havo isishiga qaramay iste’mol darajasining oshib borishi. Bu borada bizga ko‘p murojaatlar kelib tushmoqda. Fuqarolar gaz uzilgan va suyiltirilgan gazga moslashtirilgan hududlarga ham tabiiy gaz yetkazib beriladimi, degan masalani ko‘tarmoqda. Shu o‘rinda bir narsaga alohida to‘xtatilib o‘tmoqchiman. Biz nega aholini suyultirilgan gazga o‘tkazdik? Hududlarga tabiiy gazni yetkazib berishdagi uzoqliklar, yo‘qotishlar sababli. Shunday hududlar borki, masalan 300—400 xonadon yashaydi. Lekin ularga gaz yetkazib berish 60—70 kilometrni tashkil etadi. Natijada esa gaz sarfi 2—2,5 baravarga oshib ketmoqda”.
Bahodir Eshmurodov so‘nggi paytlarda is gazidan zaharlanish bilan bog‘liq fojiaviy holatlar ko‘payib borayotganini afsus bilan tilga oldi:
“ ‘O‘ztransgaz’ aksiyadorlik jamiyati minglab kilometr chuqurlikdan tabiiy gazni qazib oladi, uni qayta ishlaydi, uni transportirovka qilib, xonadonlarimizda issiqlik bo‘lsin, yaxshilik bo‘lsin degan maqsadda olib kelingan tabiiy gaz insonlarning o‘limiga sabab bo‘layotgani bizga ikki karra og‘ir botmoqda. Shuning uchun hozir Ichki ishlar, favqulodda vaziyatlar vazirliklari,viloyatlar hokimliklari bilan hamkorlikda dudburonlar bilan ishlash borasida profilaktika ishlarini olib bormoqdamiz.
Hozir ham imkoniyatdan foydalangan holda iste’molchilarimizdan tabiiy gazdan foydalanishda xavfsizlik qoidalariga e’tibor berishlarini so‘rayman”.
Izoh (0)