Халқаро пресс клубнинг инвестиция масалаларига бағишланган сессиясида спикер сифатида иштирок этган «Ўзтрансгаз» АЖ нинг янги раҳбари Баҳодир Эшмуродов ис газидан заҳарланиш билан боғлиқ фожиалар кўпайиб бораётганига муносабат билдирди, деб хабар берди «Дарё» мухбири Севара Нишонова.
Баҳодир Эшмуродов Ўзбекистон қўшни давлатлардан газ сотиб олмаётгани, шунчаки газни истеъмолчиларга етказиб беришда қўшни давлатлар қувурларидан фойдаланаётганини қайд этиб ўтди:
«Биз қўшни давлатлардан газ сотиб олаётганимиз йўқ, бу ўзимизнинг газимиз. Қўшнилар билан йўлга қўйган муносабатларимиздан унумли фойдаланиш мақсадида биз қўшни давлатлар газотранспорт тизимидан фойдаланяпмиз, холос. Бизнинг иккита катта газ омборимиз бор. Бири Андижон вилояти Хўжаобод газ омбори, иккинчиси Бухоро вилоятида жойлашган Газли газ омбори. Газлидаги омборимиз анча катта, шунинг учун биз у ердаги газни қўшни давлат қувурларидан фойдаланган ҳолда тўғридан-тўғри Тошкент ва Тошкент орқали водийга етказиб бериш масаласини ўрганиб чиқдик. Ва биз ушбу мақсадни мана шу маршрут орқали амалга оширдик».
Шунингдек, «Ўзтрансгаз» АЖ раиси чекка ҳудудлар аҳолиси нима сабабдан табиий газдан узилиб, суюлтирилган газга ўтказилгани ҳақида қуйидагиларни маълум қилди:
«Иккинчи масала, ҳаво исишига қарамай истеъмол даражасининг ошиб бориши. Бу борада бизга кўп мурожаатлар келиб тушмоқда. Фуқаролар газ узилган ва суйилтирилган газга мослаштирилган ҳудудларга ҳам табиий газ етказиб бериладими, деган масалани кўтармоқда. Шу ўринда бир нарсага алоҳида тўхтатилиб ўтмоқчиман. Биз нега аҳолини суюлтирилган газга ўтказдик? Ҳудудларга табиий газни етказиб беришдаги узоқликлар, йўқотишлар сабабли. Шундай ҳудудлар борки, масалан 300—400 хонадон яшайди. Лекин уларга газ етказиб бериш 60—70 километрни ташкил этади. Натижада эса газ сарфи 2—2,5 бараварга ошиб кетмоқда».
Баҳодир Эшмуродов сўнгги пайтларда ис газидан заҳарланиш билан боғлиқ фожиавий ҳолатлар кўпайиб бораётганини афсус билан тилга олди:
« ‘Ўзтрансгаз’ акциядорлик жамияти минглаб километр чуқурликдан табиий газни қазиб олади, уни қайта ишлайди, уни транспортировка қилиб, хонадонларимизда иссиқлик бўлсин, яхшилик бўлсин деган мақсадда олиб келинган табиий газ инсонларнинг ўлимига сабаб бўлаётгани бизга икки карра оғир ботмоқда. Шунинг учун ҳозир Ички ишлар, фавқулодда вазиятлар вазирликлари,вилоятлар ҳокимликлари билан ҳамкорликда дудбуронлар билан ишлаш борасида профилактика ишларини олиб бормоқдамиз.
Ҳозир ҳам имкониятдан фойдаланган ҳолда истеъмолчиларимиздан табиий газдан фойдаланишда хавфсизлик қоидаларига эътибор беришларини сўрайман».
Изоҳ (0)