O‘zbekistonlik talabalar Misrning al-Azhar majmuasida grant asosida ta’lim oladi

Avvalroq, O‘zbekiston delegatsiyasi Misr Arab Respublikasiga jo‘nab ketgani haqida xabar berilgan edi. Safar doirasida Misrning al-Azhar majmuasi bilan diniy kadrlar tayyorlash, ularning kasb-mahoratini oshirish, xalqaro konferensiyalar va seminarlar o‘tkazishga oid diniy-ma’rifiy sohadagi hamkorlik masalalari muhokama qilinishi ko‘zda tutilgan. Bu haqda O‘zbekiston musulmonlari idorasi Matbuot xizmati xabar bermoqda.

Misr poytaxti Qohira shahrida O‘zbekiston delegatsiyasi mamlakatning Misrdagi elchixonasi bilan hamkorlikda al-Azhar majmuasi rahbarining boshlang‘ich va o‘rta ta’lim bo‘yicha boshqarma boshlig‘i Shayx Ali al-Xaliliy, al-Azhar shayxining maslahatchisi professor Abdurahmon Muso hamda al-Azhar rektori, professor Muhammad Mahrasoviy bilan uchrashdi.

Uchrashuv doirasida al-Azhar majmuasi hamda O‘zbekistondagi diniy sohaga oid markazlar o‘rtasida hamkorlik qilish to‘g‘risidagi memorandum loyihasi ustida muhokama o‘tkazilib, al-Azhar va O‘zbekistondagi diniy ta’lim muassasalari o‘rtasida talabalar almashinuvi yo‘lga qo‘yish alohida qayd qilindi. Kelishuvga muvofiq, har yili o‘zbekistonlik 25 nafar talaba uchun al-Azhar tomonidan grant ajratiladi. Shundan 20 nafar bakalavr bosqichi uchun 5 nafari esa magistratura bosqichi uchun ajratilishi belgilab quyildi.