Toshkentdagi “Turkiston” saroyida 29-dekabr kuni “Prezident archasi” tantanalari boshlandi, deb xabar beradi O‘zA.
Bayramona bezatilgan “Turkiston” saroyidagi archa atrofida Qorbobo va Qorqiz bolajonlarni raqsga chorlaydi. Turli ertak qahramonlari kichkintoylarning zukkoligini sinaydi.
Bir-biridan qiziqarli, mo‘jizalarga boy sahna ko‘rinishlari bayram ishtirokchilariga manzur bo‘lmoqda.
Bayram shodiyonalari “Tomosha” bolalar musiqiy teatr-studiyasi tomonidan tayyorlangan “Orzu qil!” nomli teatrlashtirilgan musiqiy dasturi bilan davom etdi.
Mazkur dastur o‘g‘il-qizlarning dunyoqarashini kengaytirishga xizmat qilishi bilan ahamiyatlidir.
Bolalarga Prezidentning Yangi yil sovg‘alari topshirildi.
Eslatib o‘tamiz, bunday tadbirlar Qoraqalpog‘iston Respublikasi va barcha viloyatlarda bo‘lib o‘tmoqda.
Izoh (0)