“Daryo” tahririyatiga Samarqand viloyati Bulung‘ur tumani Mingtepa MFYda yashovchi tadbirkor, “Diyor-Olimxon” mas’uliyati cheklangan jamiyati rahbari Abdurasul Rahimberdiyev murojaat qilib, 2017-yilning 22-iyun kuni Fuqarolik ishlari bo‘yicha Pastdarg‘om tuman sudi raisi A.Boltayevning hukmi asosida 2015-yilda ishlab chiqarilgan Nexia-2 DONC rusumli avtomashinasini kim oshdi savdosi yo‘li orqali Farg‘ona viloyati Oltiariq tumanida yashovchi Dadaxon Burxonovga sotib yuborganligi yuzasidan shikoyat qilgan.
“Daryo” muxbiri Farhod Norbo‘tayev murojaatda keltirilgan holatlar yuzasidan jurnalistik surishtiruv olib bordi.
“2017-yilning 23-aprel kuni ‘Maroqand’ avtomobil bozoridan davlat raqami 30 L 648 OA Nexia-2 DONC rusumli avtomobilni 5800 AQSh dollariga sotib oldim. 2017-yilning 5-may kuni notarial tasdiqlangan oldi-sotdi shartnomasiga asosan Manzura Xo‘jayeva Nexia-2 DONC avtomashinasini menga rasmiylashtirib berdi. Ammo kutilmaganda Fuqarolik ishlari bo‘yicha Pastdarg‘om tuman sudi raisi A. Boltayevning hukmi asosida avtomobil kim oshdi savdosida sotib yuborildi”, — deydi Abdurasul Rahimberdiyev.
Ma’lum bo‘lishicha, Abdurasul Rahimberdiyev sotib olgan avtomobil Abdurahmon O‘ktamovga tegishli bo‘lgan. 2016-yilning 4-dekabr kuni Abdurahmon O‘ktamov Nexia-2 DONC avtomobilida Aziza Hakimova ismli fuqaroning Malibu avtomashinasi bilan to‘qnashuv sodir qilgan. Jinoyat ishlari bo‘yicha Samarqand shahar sudining 2017-yil 10-fevraldagi qarori asosida Abdurahmon O‘ktamov ma’muriy javobgarlikka tortilib, 15 071 495 so‘m miqdorida moddiy zarar to‘lash yuzasidan sud hukmi chiqqan.
Abdurahmon O‘ktamovning onasi Manzura Xo‘jayeva avtohalokat natijasida jiddiy jarohat olgan o‘g‘lini kasalxonaga davolatish uchun pul zarur bo‘lganligi uchun Nexia-2 DONC rusumli avtomobilni sotishga majbur bo‘lgan. Avtomobil sotilayotgan vaqtda hech qanday taqiqda turmagan. Aziza Hakimovaga to‘lanishi lozim bo‘lgan moddiy zarar Abdurahmon O‘ktamovning ish haqqidan to‘lab berilishi belgilab berilgan.
2017-yilning 2-mart kuni Abdurahmon O‘ktamov notarial tasdiqlangan hadya shartnomasiga asosan avtomobilni onasi Manzura Xo‘jayevaga hadya qilgan. O‘z navbatida Manzura Xo‘jayeva avtomobilni Abdurasul Rahimberdiyevga sotgan.
Sud hukmi bilan Abdurasul Rahimberdiyevga tegishli bo‘lgan avtomobil qaytarib olingan va O‘zbekiston Respublikasi Bosh prokuratura huzuridagi Majburiy ijro byurosi “Elektron-onlayn auksionlarni tashkil etish markazi” davlat unitar korxonasining 2017-yil 21-noyabrdagi “OA 0705-000003-sonli “Elektron-onlayn auksion natijalari to‘g‘risida”gi bayonnomasiga asosan avtotransport vositasi sotilgan.
“Fuqarolik ishlari bo‘yicha Pastdarg‘om tuman sudi raisi A. Boltayev qaysi asoslar bilan o‘zganing mulkini kim oshdi savdosiga sotish to‘g‘risida hukm chiqarganini tushunmadim. Bir yarim yil davomida prezident qabulxonasiga va boshqa instansiyalarga ariza bilan murojat qilib keldim. Ular arizalarimni qaytadan yana o‘sha sudyaning o‘ziga yuborishdi. Sudya esa, arizani ko‘tarib prezidentga borsangiz ham baribir mening aytganim bo‘ladi deya meni masxara qildi. Oliy sudning ajrimini tan olmayman. Uni Toshkentda o‘tirganlar chiqargan. Oliy sud chiqargan ajrim bilan avtomashinangizni topib oling deb meni haqorat qildi”, — deydi Abdurasul Rahimberdiyev.
Salkam ikki yillik ovoragarchiliklardan so‘ng O‘zbekiston Respublikasi Oliy sudi Fuqarolik ishlari bo‘yicha sudlov hay’atining 2018-yil 15-yanvar kungi ajrimi, FIB Samarqand shahar sudining joriy yil 22-iyundagi hal qiluv qarori asosida Nexia-2 DONC rusumli avtomobili Abdurasul Rahimberdiyevga qaytarib berilishi yuzasidan qaror chiqarilgan.
Biroq, bugungi kunda bu ishni bajarishga mas’ul bo‘lgan Majburiy ijro byurosi negadir ishni paysalga solib kelmoqda. Xususan, Fuqarolik ishlari bo‘yicha Samarqand shahar sudi Bosh prokuratura huzuridagi Majburiy ijro byurosi Farg‘ona viloyati Oltiariq tuman bo‘limiga 2018-yilning 16-iyul kuni avtomobilni egasiga qaytarish yuzasidan murojaat qilgan. Biroq, MIB Oltiariq tuman bo‘limi mazkur ijroni ta’minlamay kelmoqda.
“Diyor Olimxon” mas’uliyati cheklangan jamiyati rahbari Abdurasul Rahimberdiyev Fuqarolik ishlari bo‘yicha Pastdarg‘om tuman sudi sudyasi A.Boltayevning chiqargan hukmi va yetkazilgan moddiy zarari yuzasidan 2018-yilning 24-sentabr va 6-noyabr kunlari Samarqand viloyat hokimi Erkinjon Turdimovga murojaat qilgan. Biroq, hech qanday natija bo‘lmagan.
“Viloyat hokimi Erinjon Turdimov bilan ikki bor uchrashdim. Ikkala uchrashuvda ham viloyat prokuroriga mening muammomni zudlik bilan hal qilib berish bo‘yicha topshiriq berdi. Ammo Samarqand viloyat prokuraturasi, Majburiy ijro byurosi viloyat bo‘limi hokimning topshirig‘ini bajargisi kelmayapti. Bitta avtomobil mojarosi sabab bugun tadbirkorlik faoliyatim inqirozga yuz tutdi. Oilam parokanda bo‘ldi. Nahotki mutasaddi tashkilot vakillari o‘z ishiga shunchalik sovuqqonlik bilan yondoshadi”, — deydi Abdurasul Rahimberdiyev.
Shu o‘rinda savol tug‘iladi. Abdurasul Rahimberdiyev avtomobilni o‘z nomiga rasmiylashtirib olguncha notarius N. Norqulov, Samarqand viloyati Yo‘l harakat xavfsizligi boshqarmasi mas’ul xodimlari nimani o‘rganib chiqdi. Axir Abdurasul Rahimberdiyev barcha hujjatlarni tegishli tashkilotlar orqali amalga oshirganku? Bu vakolatli shaxslarning o‘z vazifasiga bo‘lgan mas’uliyatsizlik emasmi?
Bu esa alohida mavzu.
Izoh (0)