Agar Qirg‘izistonda qonunchilikka kiritilgan o‘zgartishlar kuchga kirsa, ota-onalar uch yoshgacha bo‘lgan farzandlarini uch oydan ortiq muddatga tashlab keta olmaydi. Bu haqda Sputnik “Huquq markazi” jamoatchilik fondi direktori Gulnora Sheyshekeyevaga tayanib xabar berdi.
Sheyshekeyeva Sputnik Qirg‘iziston multimedia matbuot-markazida “Qirg‘izistondagi migrantlarning farzandlarini qanday himoya qilish mumkin” mavzusida o‘tkazilgan davra suhbatida chiqish qildi.
Sheyshekeyevaning so‘zlariga ko‘ra, agar ota-onalar chet davlatga pul topish ilinjida chiqib ketsa, ular ishonchnoma imzolashi kerak bo‘ladi. Ushbu hujjatning amal qilish muddati aniq belgilanadi.
“Uch yoshgacha bo‘lgan bolaga ishonchnoma muddati 3 oygacha, kattaroq yoshdagi bolalarga — yarim yilgacha etib muddat belgilashni mo‘ljallamoqdamiz”, — deb qayd etgan ayol.
Rejaga muvofiq, ishonchnoma muddatini masofadan turib uzaytirish mumkin. Agar ota-onalar chet elda uzoq qolib ketadigan bo‘lsa, shu bilan birga ularda o‘z farzandlarini birga olib ketishga imkoniyat bo‘lmasa, bolalarni boshqa oilaga doimiy vasiylikka topshirish kerak bo‘ladi.
Izoh (0)