2018-yilning 27—28-noyabr kunlari Ostona shahrida “Fuqarolik jamiyati va davlat: dialog, hamkorlik, ishonch” mavzusida Qozog‘istonning VIII fuqarolik forumi bo‘lib o‘tdi. Bu haqda “Daryo”ga Adliya vazirligi Jamoatchilik bilan aloqalar bo‘limi xabar berdi.
Forumda 17 ta xalqaro va 20 ta donor tashkilotlar, davlat organlari, jamoat kengashlari va diplomatik missiyalar vakillari vazirlik va idoralar rahbarlari ishtirok etdi.
Tadbir doirasida Qozog‘iston Respublikasi Prezidenti Nursulton Nazarboyev ishtirokida plenar yig‘ilish bo‘lib o‘tdi. Ishtirokchilar tomonidan 2019-2024-yillar uchun fuqarolik jamiyati institutlarini rivojlantirish konsepsiyasi loyihasi muhokama qilindi.
O‘zbekiston Respublikasi Adliya vazirligi vakillari Forum ishtirokchilariga O‘zbekistonda nodavlat notijorat va diniy tashkilotlar uchun yaratib berilayotgan imkoniyatlar xususida ma’lumotlar berdi.
Tadbirda O‘zbekistonda ekologiya va atrof-muhitni muhofaza qilish, nogironligi bo‘lgan shaxslar va kam ta’minlangan oilalarni qo‘llab-quvvatlashga qaratilgan ijtimoiy loyihalarni amalga oshiradigan fuqarolik jamiyati institutlarini qo‘llab-quvvatlash uchun bir million AQSh dollari miqdorida xorijiy grant mablag‘lari jalb qilinishga kelishildi.
Izoh (0)