“Daryo” tahririyatiga Tashqi iqtisodiy faoliyat Milliy banki Bulung‘ur filialining 26 nafar ishchi xodimlari tomonidan murojaat kelib tushdi. Unda 1998-yildan buyon faoliyat yuritib tumandagi tadbirkorlik subyektlarni moliyaviy qo‘llab-quvvatlash, tumanda tadbirkorlik muhitini rivojlantirish borasida qator ishlarni amalga oshirib kelgan bank faoliyati bugungi kunda to‘xtatilayotganligini bildirilgan.
“Daryo” muxbiri Farhod Norbo‘tayev mazkur murojaat asosida jurnalistik surishtiruv o‘tkazib, bankda yuzaga kelgan muammolarni atroflicha o‘rgandi.
Bankning ishchi xodimlari bilan bo‘lib o‘tgan suhbat jarayonida ma’lum bo‘lishicha, 2006—2007-yillarda respublikada eng na’munali banklardan biri bo‘lgan Milliy bankning Bulung‘ur filialida so‘nggi 2 yil davomida 6 nafar rahbar almashgan. Har to‘rt oyda yangi bank rahbarining almashtirilishida ularning bankdagi turli qing‘irliklari sabab bo‘lgan. Hatto bu yerda ishlagan ba’zi rahbarlar ustidan jinoyat ishi ochilgan bo‘lsa, ayrimlari ayni paytda qidiruvdaligi ma’lum bo‘ldi.
“Bankda ishlagan sobiq rahbarlarning o‘z vazifasiga sovuqqonlik bilan yondashgani, uni rivojlantirish o‘rniga o‘z manfaatini ustun qo‘yib, turli qing‘irliklarni amalga oshirganligi sabab so‘nggi ikki yilda daromad pasayib ketgandi. Shu sababli bugun biz faoliyat yuritayotgan bank yopilish arafasida, — deydi bankning kassa mudiri Salima Javdarova. — Sobiq rahbarlarning qilgan ishiga bugun butun boshli bank xodimlari ishsiz qolish arafasida. Bizga ma’lum vaqt muddat berishini istaymiz. Qolaversa, bankni boshqaruvi uchun yaxshi rahbar berilsa qisqa fursatda uning faoliyati yana qayta tiklanadi”.
2018-yilning yanvar oyi holati bo‘yicha bank filiali o‘tgan yilni 2 017 200 180,21 so‘m zarar bilan yakunlagan. Bankning bu darajada katta zararga kirib qolishiga filialning sobiq boshqaruvchisi A.Shodiyev, bosh hisobchi A.Jumanazarov va ularga aloqador shaxslarning jinoiy xatti-harakatlari sabab bo‘lgan. Jinoyat ishlari bo‘yicha Samarqand shahar sudi tomonidan bankka yetkazilgan zarar qoplanib, ularga nisbatan qonuniy jazo tayinlangan.
“Hozirgi kunda ehtimoliy yo‘qotishlar uchun yaratilgan zaxira hisobiga filialimiz 724.9 million so‘m zarar bilan ishlab kelmoqda. Yilning oxirigacha sud jarayonidagi kreditlarni 1021.46 million so‘mdan 209.75 million so‘mgacha kamaytirish imkoniyatiga egamiz. Muddati o‘tgan kreditlarni to‘liq so‘ndirishni tashkil etib, yil oxirigacha 348.84 million so‘m sof foyda bilan yakunlash imkoniyatimiz bor”, — deydi bank rahbari Bahodir Rajabov.
Bank xodimlarining bildirishicha, O‘zbekiston Respublikasi tashqi iqtisodiy faoliyat Milliy bank Kengashining 2018-yil 2-apreldagi 14-sonli va Bank boshqaruvining joriy yil 3-fevraldagi 14-sonli majlisi bayoni qarorlari, Bank boshqaruvining 2018-yil 30-iyuldagi 155-sonli buyrug‘i hamda Milliy bankning 2018-yil 19-sentabrdagi ShR-16/38-sonli xati asosida filial faoliyatini tugatish belgilangan.
Afsuski, jurnalistik surishtiruv jarayonida yuqorida qayd etilgan qaror va buyruqlarning mazmun-mohiyati bilan tanishishning iloji bo‘lmadi. Aniqroq qilib aytadigan bo‘lsak, ushbu hujjatlar filialga taqdim qilinmagan ekan. Filial xodimlarning ma’lum qilishicha, joriy yilning 20-sentabr kuni Milliy bank Kengashi tomonidan filial bankrot deb e’lon qilgan. Biroq, 9-noyabrda kelib bank tizimida yangi texnologiyalarni joriy etish natijasida uning faoliyati qisqartirilayotganligini bildirishgan.
O‘rganishlar jarayonida bank mijozlari bilan ham suhbatda bo‘ldik, “Bulung‘ur avtolyuks” xususiy korxonasi rahbari Fozil Erjigitov, yakka tartibdagi tadbirkor Dilshod O‘rozov, “Musurmonqul Aliqulov” xususiy korxonasi rahbari Bobomurod Aliqulovlar bilan bo‘lib o‘tgan suhbat jarayonida, bankning xizmati, mijozlarga bo‘lgan munosabati va yaratilgan imkoniyatlari haqida ijobiy fikr bildirib, filial faoliyatini davom ettirish lozimligini aytib o‘tishdi.
“Ish faoliyatimiz davomida bir nechta banklar bilan ishlaganmiz. Biroq, ular bilan ishlashda qator muammolar yuzaga kelgan. Milliy banki Bulung‘ur filiali bilan ish olib borishimiz natijasida korxonamizning yillik pul aylanmasini 2 milliard so‘mga chiqarib oldik. Qolaversa ikki bor kredit olib, tadbirkorlik faoliyatimizni yanada kengaytirdik. Tadbirkor uchun vaqt va mablag‘ eng muhim hisoblanadi. Tadbirkorlarning vaqt va mablag‘ini tejab, mijozlarga sifatli xizmat qilayotgan bank faoliyatini to‘xtatish tizimdagi katta xatolardan biri bo‘ladi”, — deydi “Musurmonqul Aliqulov” xususiy korxonasi bosh hisobchisi Ikrom Jomonqulov.
Bugun bank xodimlari mazkur inqiroziy holatdan chiqib ketishi uchun astoyidil harakat qilmoqda. Milliy bank Bulung‘ur filiali xodimlari muammoli aktivlarni undirish bilan bir qatorda sof foyda bilan ishlash uchun imkoniyat va boshqa filialga qo‘shib yubormaslik uchun ish o‘rnini saqlab qolishni istashmoqda. Bu borada O‘zbekiston Respublikasi Prezidenti virtual qabulxonasiga, Samarqand viloyati hokimi Erkinjon Turdimovga murojaat qilishgan.
O‘ylaymizki, O‘zbekiston Respublikasi tashqi iqtisodiy faoliyat Milliy banki tomonidan mazkur holat atroflicha o‘rganilib, bugun vatan ravnaqi uchun mehnat qilayotgan bank xodimlariga yana bir bor imkoniyat yaratib beradi degan umiddamiz.
“Daryo” mazkur masala yuzasidan O‘zbekiston Respublikasi tashqi iqtisodiy faoliyat Milliy bankining fikrini kutib qoladi.
Izoh (0)