«Дарё» таҳририятига Ташқи иқтисодий фаолият Миллий банки Булунғур филиалининг 26 нафар ишчи ходимлари томонидан мурожаат келиб тушди. Унда 1998 йилдан буён фаолият юритиб тумандаги тадбиркорлик субъектларни молиявий қўллаб-қувватлаш, туманда тадбиркорлик муҳитини ривожлантириш борасида қатор ишларни амалга ошириб келган банк фаолияти бугунги кунда тўхтатилаётганлигини билдирилган.
«Дарё» мухбири Фарҳод Норбўтаев мазкур мурожаат асосида журналистик суриштирув ўтказиб, банкда юзага келган муаммоларни атрофлича ўрганди.
Банкнинг ишчи ходимлари билан бўлиб ўтган суҳбат жараёнида маълум бўлишича, 2006—2007 йилларда республикада энг наъмунали банклардан бири бўлган Миллий банкнинг Булунғур филиалида сўнгги 2 йил давомида 6 нафар раҳбар алмашган. Ҳар тўрт ойда янги банк раҳбарининг алмаштирилишида уларнинг банкдаги турли қинғирликлари сабаб бўлган. Ҳатто бу ерда ишлаган баъзи раҳбарлар устидан жиноят иши очилган бўлса, айримлари айни пайтда қидирувдалиги маълум бўлди.
«Банкда ишлаган собиқ раҳбарларнинг ўз вазифасига совуққонлик билан ёндашгани, уни ривожлантириш ўрнига ўз манфаатини устун қўйиб, турли қинғирликларни амалга оширганлиги сабаб сўнгги икки йилда даромад пасайиб кетганди. Шу сабабли бугун биз фаолият юритаётган банк ёпилиш арафасида, — дейди банкнинг касса мудири Салима Жавдарова. — Собиқ раҳбарларнинг қилган ишига бугун бутун бошли банк ходимлари ишсиз қолиш арафасида. Бизга маълум вақт муддат беришини истаймиз. Қолаверса, банкни бошқаруви учун яхши раҳбар берилса қисқа фурсатда унинг фаолияти яна қайта тикланади».
2018 йилнинг январь ойи ҳолати бўйича банк филиали ўтган йилни 2 017 200 180,21 сўм зарар билан якунлаган. Банкнинг бу даражада катта зарарга кириб қолишига филиалнинг собиқ бошқарувчиси А.Шодиев, бош ҳисобчи А.Жуманазаров ва уларга алоқадор шахсларнинг жиноий хатти-ҳаракатлари сабаб бўлган. Жиноят ишлари бўйича Самарқанд шаҳар суди томонидан банкка етказилган зарар қопланиб, уларга нисбатан қонуний жазо тайинланган.
«Ҳозирги кунда эҳтимолий йўқотишлар учун яратилган захира ҳисобига филиалимиз 724.9 миллион сўм зарар билан ишлаб келмоқда. Йилнинг охиригача суд жараёнидаги кредитларни 1021.46 миллион сўмдан 209.75 миллион сўмгача камайтириш имкониятига эгамиз. Муддати ўтган кредитларни тўлиқ сўндиришни ташкил этиб, йил охиригача 348.84 миллион сўм соф фойда билан якунлаш имкониятимиз бор», — дейди банк раҳбари Баҳодир Ражабов.
Банк ходимларининг билдиришича, Ўзбекистон Республикаси ташқи иқтисодий фаолият Миллий банк Кенгашининг 2018 йил 2 апрелдаги 14-сонли ва Банк бошқарувининг жорий йил 3 февралдаги 14-сонли мажлиси баёни қарорлари, Банк бошқарувининг 2018 йил 30 июлдаги 155-сонли буйруғи ҳамда Миллий банкнинг 2018 йил 19 сентябрдаги ШР-16/38-сонли хати асосида филиал фаолиятини тугатиш белгиланган.
Афсуски, журналистик суриштирув жараёнида юқорида қайд этилган қарор ва буйруқларнинг мазмун-моҳияти билан танишишнинг иложи бўлмади. Аниқроқ қилиб айтадиган бўлсак, ушбу ҳужжатлар филиалга тақдим қилинмаган экан. Филиал ходимларнинг маълум қилишича, жорий йилнинг 20 сентябрь куни Миллий банк Кенгаши томонидан филиал банкрот деб эълон қилган. Бироқ, 9 ноябрда келиб банк тизимида янги технологияларни жорий этиш натижасида унинг фаолияти қисқартирилаётганлигини билдиришган.
Ўрганишлар жараёнида банк мижозлари билан ҳам суҳбатда бўлдик, «Булунғур автолюкс» хусусий корхонаси раҳбари Фозил Эржигитов, якка тартибдаги тадбиркор Дилшод Ўрозов, «Мусурмонқул Алиқулов» хусусий корхонаси раҳбари Бобомурод Алиқуловлар билан бўлиб ўтган суҳбат жараёнида, банкнинг хизмати, мижозларга бўлган муносабати ва яратилган имкониятлари ҳақида ижобий фикр билдириб, филиал фаолиятини давом эттириш лозимлигини айтиб ўтишди.
«Иш фаолиятимиз давомида бир нечта банклар билан ишлаганмиз. Бироқ, улар билан ишлашда қатор муаммолар юзага келган. Миллий банки Булунғур филиали билан иш олиб боришимиз натижасида корхонамизнинг йиллик пул айланмасини 2 миллиард сўмга чиқариб олдик. Қолаверса икки бор кредит олиб, тадбиркорлик фаолиятимизни янада кенгайтирдик. Тадбиркор учун вақт ва маблағ энг муҳим ҳисобланади. Тадбиркорларнинг вақт ва маблағини тежаб, мижозларга сифатли хизмат қилаётган банк фаолиятини тўхтатиш тизимдаги катта хатолардан бири бўлади», — дейди «Мусурмонқул Алиқулов» хусусий корхонаси бош ҳисобчиси Икром Жомонқулов.
Бугун банк ходимлари мазкур инқирозий ҳолатдан чиқиб кетиши учун астойидил ҳаракат қилмоқда. Миллий банк Булунғур филиали ходимлари муаммоли активларни ундириш билан бир қаторда соф фойда билан ишлаш учун имконият ва бошқа филиалга қўшиб юбормаслик учун иш ўрнини сақлаб қолишни исташмоқда. Бу борада Ўзбекистон Республикаси Президенти виртуал қабулхонасига, Самарқанд вилояти ҳокими Эркинжон Турдимовга мурожаат қилишган.
Ўйлаймизки, Ўзбекистон Республикаси ташқи иқтисодий фаолият Миллий банки томонидан мазкур ҳолат атрофлича ўрганилиб, бугун ватан равнақи учун меҳнат қилаётган банк ходимларига яна бир бор имконият яратиб беради деган умиддамиз.
«Дарё» мазкур масала юзасидан Ўзбекистон Республикаси ташқи иқтисодий фаолият Миллий банкининг фикрини кутиб қолади.
Изоҳ (0)