Xitoyning OAV sohasidagi tajribasini o‘rganish, provinsiyalari va shaharlarining “Bir makon, bir yo‘l” loyihasi doirasidagi iqtisodiy imkoniyatlari bilan yaqindan tanishish maqsadida bir guruh o‘zbekistonlik jurnalistlar uchun ushbu mamlakatga media-tur tashkil etildi. Bu haqda “Daryo” muxbiri Azizjon Ermatov xabar berdi.
O‘zbekistonlik jurnalistlar dastlab “Sinxua” axborot agentligida bo‘lib, media markazidagi so‘nggi texnologiyalar bilan tanishdi.
Mazkur media-markaz mutaxassislari tomonidan yangiliklarni o‘quvchi sun’iy boshlovchi yaratilgan. U bir sutkada 24 soat ishlashi, sintetik ovozdan foydalangan holda matnlarni o‘qishi mumkin. Sun’iy intellekt asosida ishlaydigan ushbu virtual teleboshlovchi xitoyliklarning ovozi, lab harakati va yuz ifodalarini o‘xshata oladi. U xitoy va ingliz tillarida dasturlarni olib boradi.
Media-markazdagi innovatsion texnologiyalardan yana biri — maxsus qurilma biror anjuman yoki tadbirni kuzatib, uning tafsilotlari haqidagi xabar yoki yangilikni o‘n soniya ichida tayyorlab beradi. Mutaxassislar tadbirga oid axborotni jurnalistlar qancha muddatda tayyorlashi mumkinligini ham tekshirib ko‘rishdi. Muxbir bir tadbir to‘g‘risidagi xabarni tezkor tayyorlashi uchun 15 daqiqa sarflar ekan.
“So‘nggi yillarda Xitoy ommaviy axborot vositalari bilan hamkorligimiz yanada faol rivojlanmoqda. Jurnalistlar va texnik mutaxassislarimiz uchun Xitoyga media-tur va ijodiy safarlar muntazam tashkil etilmoqda. Qolaversa, xitoylik hamkasblarimiz ham ayni shu maqsadda O‘zbekistonda bo‘lib, televideniye, radio va gazetalar faoliyati bilan yaqindan tanishmoqda”, — deydi O‘zbekiston jurnalistlar ijodiy uyushmasi Farg‘ona viloyat bo‘limi raisi Muhammadjon Obidov.
“Sinxua” nafaqat Xitoyda, balki dunyoda ham eng yirik xalqaro axborot agentliklaridan biri hisoblanadi. Agentlik Xitoyda va boshqa xorijiy mamlakatlarda 130 dan ortiq bosh boshqarma, bo‘lim va filiallariga ega. Xitoyning barcha hududida muxbirlar punktlari mavjud. Agentlik tizimida 4 ming nafarga yaqin mutaxassis ishlaydi.
Agentlik 10 tilda axborot tarqatadi. Agentlik tarkibidagi internet saytlariga har kuni 15 mingdan ortiq informatsion materiallar jaylashtiriladi. Agentlik veb-saytiga bir kunda 100 milliondan ziyod o‘quvchi kiradi.
Izoh (0)