16—17-noyabr kunlari Buxoro shahrida “Saylov qonunchiligini takomillashtirish va demokratik saylovlar: O‘zbekiston tajribasi va xalqaro amaliyot” mavzusida xalqaro konferensiya bo‘lib o‘tadi. Bu haqda konferensiya tashkilotchilari “Daryo”ga xabar berdi.
Xalqaro konferensiya O‘zbekiston Respublikasi Markaziy saylov komissiyasining tashabbusi bilan Yevropada xavfsizlik va hamkorlik tashkilotining O‘zbekistondagi loyihalari koordinatori hamda Konrad Adenauer nomidagi jamg‘armaning Markaziy Osiyo bo‘yicha mintaqaviy vakolatxonasi hamkorligida o‘tkazilmoqda. Konferensiyani tashkil etishda Oliy Majlis palatalari, Fuqarolik jamiyati shakllanishini monitoring qilish mustaqil instituti va Buxoro viloyati hokimligi ham ishtirok etmoqda.
Mazkur konferensiyadan ko‘zlangan maqsad xalqaro va xorijiy ekspertlar ishtirokida O‘zbekiston Respublikasi Saylov kodeksi loyihasi, shuningdek saylov jarayonlariga axborot-kommunikatsiya texnologiyalarini joriy qilish bilan bog‘liq masalalar muhokama qilinadi.
Konferensiya ishida Yevropada xavfsizlik va hamkorlik tashkilotining Demokratik institutlar va inson huquqlari bo‘yicha byurosi, Venetsian komissiyasi, Butunjahon saylov organlari assotsiatsiyasi, BMT Kotibiyati huzuridagi Siyosiy masalalar bo‘yicha departamentning saylovlar o‘tkazishga ko‘maklashish bo‘limi va boshqa shu kabi xalqaro institutlarning vakillari qatnashishi kutilmoqda.
Ushbu tadbirni yoritish maqsadida ommaviy axborot vositalarining vakillari ham jalb qilinadi.
Izoh (0)