Ukrainaning “Oryol i reshka” ko‘rsatuvi ijodkorlari ko‘rsatuvning navbatdagi sonini O‘zbekistonda suratga olayotganida qator muammolarga duch kelgani, xususan ularga metroda tasvirga olishga ruxsat berilmagani haqida xabar berilgan edi. Ko‘rsatuvning ushbu soni 11-noyabr kuni YouTube’ga joylashtirildi.
O‘zA “Toshkent metropoliteni” unitar korxonasi harakat xizmati boshlig‘i Sulton Qodirov bilan suhbatda qanday hollarda metro ichida suratga tushib bo‘lmasligiga oydinlik kiritdi.
“Bugun metrodan foydalanuvchilar boshqa yo‘lovchilarga ziyoni tegmagan holda suratga tushishlari mumkin. Xohlagan vaqtida ushbu rasmlarini ijtimoiy tarmoqlarda targ‘ib qilishlari, tarqatishlari ham taqiqlanmagan. Bu esa bizga turizmni targ‘ib qilishda yaxshi samara bermoqda. Avval ruxsat berilmaganligining asosiy sababi noo‘rin rasmlar chetga chiqib ketmasligi, metropoliten faoliyatiga zarar keltiruvchi suratlar targ‘ib qilinmasligi uchun belgilangan tartibda taqiqlar bor edi. Ammo metropoliten ichida suratga tushish mumkin degani, tartibni buzish, shovqin ko‘tarish, ma’muriyatining ruxsatisiz videoyozuvchi va boshqa mobil-elektron moslamalari (mobil telefon, smartfon, planshet va boshqalar) orqali kino – fotosuratga olish, shuningdek, tovush chiqaruvchi va boshqa texnikadan, magnitofon, radiopriyomnik eshitish moslamalari bilan yoki ularsiz hamda cholg‘u asboblaridan foydalanish, jamoat tartibiga xavf soluvchi omillarni keltirib chiqarish degani emas”, — deydi “Toshkent metropoliteni” unitar korxonasi harakat xizmati boshlig‘i Sulton Qodirov.
Izoh (0)