Buxoro viloyati davlat soliq xizmati organlari xodimlari bevosita joylarga chiqib, qo‘lbola isitish moslamalari bilan savdo qilish noqonuniy ekanligi yuzasidan tadbirkorlar o‘rtasida tushuntirish ishlarini olib bormoqda. Bu haqda viloyat soliq boshqarmasi matbuot xizmati “Daryo” ga xabar berdi.
“Qaror talablaridan kelib chiqib, bozorlar va savdo komplekslarida ‘qo‘lbola’ usulda yasalgan isitish vositalarini sotish noqonuniy ekanligi yuzasidan bugungi kunga qadar 10 nafardan ortiq tadbirkorga rasman ogohlantirishlar berildi va ularning bunday vositalarni sotishdan voz kechishlariga erishilmoqda. Ogohlantirishdan keyin ham ushbu moslamalarni sotish davom ettirilsa, ularga nisbatan qonuniy choralar ko‘riladi, tovar moddiy boyliklar esa davlat foydasiga musodara qilinadi”, — deydi viloyat DSB Jamoatchilik bilan aloqalar va huquqiy axborot sho‘basi mas’ul xodimi A.Ochilov.
Jumladan, Buxoro shahrida istiqomat qiluvchi fuqaro Azim Amonov hech qanday hujjatlarsiz qo‘lbola yasalgan nostandart isitish moslamalarini ishlab chiqarib, shahar hududidagi bozorda sotish bilan shug‘ullanib kelayotganligi aniqlanib, belgilangan tartibda dalolatnoma rasmiylashtirildi.
Natijada, ushbu “tadbirkor”ning 7 xil turdagi 60 dona 3 million 400 ming so‘mlik, xuddi shunday faoliyat bilan shug‘ullanib kelayotgan g‘ijduvonlik “uddaburon”ning esa fuqaro Salomat Narzullayeva qo‘lbola yasalgan gaz puflagichlarni sotayotganligi aniqlanib, belgilangan tartibda savdodan olib qo‘yildi.
Shuningdek, Olot tumanidagi Olot tuman Xalifa mahalla fuqarolar yig‘ini hududida joylashgan ustaxonada fuqaro Xasan Ro‘ziyev hech qanday hujjatlarsiz noqonuniy ravishda temirdan gaz isitgich moslamalari hamda qo‘l bola yasalgan elektr jihozlarini yasash bilan shug‘ullanayotganligi aniqlandi. Natijada, qoidabuzarga belgilangan tartibda chora ko‘rildi hamda uning ustaxonasidan qo‘lbola yasalgan isitish anjomlari daliliy ashyo sifatida vaqtincha saqlash uchun olindi.
Izoh (0)