Respublika Onkologiya va radiologiya ilmiy-amaliy markazi Navoiy viloyati filialida bemor psixotrop dori vositasini o‘tkazmasdan operatsiya qilganligi, lekin kasallik tarixiga va boshqa kirim chiqim kitoblariga yolg‘on ma’lumotlar kiritilganligi aniqlandi. Bu haqda “Xalq so‘zi” xabar bermoqda.
Mazkur holat ushbu tibbiy muassasa hamshirasining murojaati asosida Navoiy viloyat Sog‘liqni saqlash boshqarmasining xizmat tekshiruvida o‘z tasdig‘ini topdi. Undagi xulosada Respublika Onkologiya va radiologiya ilmiy-amaliy markazi Navoiy viloyati filiali reanimatsiya bo‘lim mudiri S. T. hamda shu bo‘lim hamshirasi J. X. bemor Amirqul Temirovni jarrohlik operatsiyasi qilishda psixotrop dori vositasini o‘tkazmasdan, bemorning tibbiy bayonnomasi narkoz varag‘i hamda psixotrop moddani kirim-chiqim kitoblariga bemor A. Temirov nomiga chiqim qilib, psixotrop moddani saqlash va berishning belgilangan qoidalarini buzganligi ma’lum qilingan.
Mazkur holat yuzasidan tibbiy muassasa reanimatsiya bo‘lim mudiri va hamshirasiga nisbatan O‘zbekiston Respublikasi Jinoyat Kodeksining 275-moddasi birinchi qismi bilan jinoyat ishi qo‘zg‘atilib, tergov harakatlari olib borilmoqda.
Izoh (0)