2021-yilda Axsikent shahrining 2300 yilligini o‘tkazish yuzasidan YuNЕSKOning O‘zbekistondagi vakolatxonasiga taklif berildi. Bu haqda Axsikent arxeologiya merosi obyektini muhofaza qilish va tadqiq etish direksiyasi direktori Tohirjon Qozoqov Namanganda bo‘lib o‘tgan “O‘zbek davlatchiligi tarixida Axsikent shahrining o‘rni” mavzusidagi xalqaro anjumanda ma’lum qildi, deya xabar beradi “Turon 24”.
“Direksiya o‘tgan yil dekabrda tashkil etilgan bo‘lsa, shu kungacha 3 ta xalqaro anjuman, 20 dan ortiq ilmiy ekspeditsiya uyushtirdik. 100 ga yaqin mahalliy va xalqaro tashkilotlar bilan hamkorlik shartnomasi imzolandi, — deydi Tohirjon Qozoqov. — “Axsi — Farg‘ona shaharlarining onasi”, “Ibrat o‘rgangan Axsi”, “Axsikent turistlari va ziyoratchilari uchun yo‘l ko‘rsatkich”, “Axsikent vayronalari” kabi 9 ta kitob va to‘plam chop etildi. Eng asosiysi, YuNЕSKOga 2021-yilda Axsikent shahrining 2300 yilligini o‘tkazish yuzasidan taklif berildi”.
Xalqaro anjumanda “Kelajakdagi Axsikent” mavzusidagi ma’ruza bilan ishtirok etgan KOICA vakili Chon Jin Yongga ko‘ra, Axsikentni o‘rganish va dunyoga tanitishda Janubiy Koreyaning Kyondju tarixiy shahri tajribasi asqotishi mumkin.
Kyondjuga davlat tomonidan berilgan e’tibor va mablag‘ tufayli hudud vayronalari ta’mirlangan. Undagi 3 ta obyekt YuNЕSKO ro‘yxatiga kiritilib, jahon miqyosida ommalashtirildi. Hozirda bu shaharga har yili 15 million sayyoh keladi.
Tadbir davomida Yaponiya tarix instituti tadqiqotchisi Shun Takakuraning “Axsikent va oltin beshik rivoyati”, Benjamin Arestinning (AQSh) “Axsikent tarixiy davrlarda” kabi ma’ruzalari tinglandi.
Izoh (0)