Niderlandiyada faoliyat olib borayotgan Nukus muzeyining Do‘stlar jamg‘armasi (Friends of Nucus Museum, FoNM) 2018-yilning yakuniga kelib tarqatib yuboriladi. Jamg‘arma I.V.Saviskiy nomidagi Davlat san’at muzeyiga 2001-yildan beri ko‘mak berib kelayotgan edi. Bu haqda Jamg‘arma raisi Devid Pirs ma’lumot berdi, deb yozadi Turon 24.
Devid Pirsning aytishicha, jamg‘armaning tarqatib yuborilishiga asosiy sabab, oxirgi uch yilda muzeyga taqdim qilingan xayriya sovg‘alari, kitob hamda audio jihozlarning yo‘qolishidir. “Bizga ma’lum bo‘lishicha, ular o‘g‘irlangan yoki musodara etilgan”, — deb bayonot bergan jamg‘arma raisi.
Muzey rahbariyati Devid Pirsning bayonotiga izoh berishdan bosh tortgan.
2017-yilning fevral oyidan muzeyga Gulbahor Izentayeva direktor etib tayinlangan edi. Muzeyga 1966-yilda arxeolog, etnograf va rassom Igor Saviskiy (1915—1984-yillarda) asos solgan. U Moskvadan Qoraqalpog‘istonga 1950-yilda Xorazm arxeologik-etnografik ekspeditsiyasi tarkibida kelgan va tasviriy san’at asarlarini to‘plash maqsadida bu yerda qolgan.
U ijodkorlarning 1920-1930-yillarga oid avangard va postavangard ishlarini yiqqan. Nukus muzeyida to‘plangan grafika va tasviriy san’atga oid asarlar Rus Davlat muzeyidan keyin dunyo bo‘yicha ikkinchi o‘rinda turadi.
Izoh (0)