5—7-noyabr kunlari O‘zbekiston Respublikasi Xalq ta’limi vazirligi, BMTning giyohvand moddalar va jinoyatchilik bo‘yicha boshqarmasi (UNODC) bilan hamkorlikda Toshkentdagi “Grand orzu” mehmonxonasida o‘quvchilar va oilalar bilan samarali ishlash, bir qator ijtimoiy-psixologik hayotiy ko‘nikmalarni rivojlantirish, xalq ta’limi tizimidagi mutaxassislar va ota-onalarning ta’lim-tarbiya jarayonidagi psixologik-pedagogik kompetentligini oshirishga yo‘naltirilgan “Mustahkam oila” trening dasturi va “Baxtli maktab” loyihasi konsepsiyasini o‘zlashtirish bo‘yicha respublika o‘quv seminarini tashkil etadi. Bu haqda Xalq ta’limi vazirligi axborot xizmati xabar bermoqda.
Ushbu tadbir “Mustahkam oila” trening dasturi qamrovini Respublika darajasida kengaytirishni ham nazarda tutadi.
Loyiha doirasida mamlakatning har bir hududida bittadan tayanch-trener maktab tanlab olindi. Jami 14 ta maktabda maxsus malakali psixolog va pedagoglar jamoasi ish olib boradilar hamda o‘quvchi-yoshlar va ularning ota onalari bilan zamonaviy psixologik-pedagogik texnologiyalar asosida ishlash yo‘lga qo‘yiladi. Mutaxassislar o‘quvchilar, ota onalar hamda o‘qituvchilarning baxt hissini tuyib o‘qishi, yashashi va ishlashiga turtki berishi kerak bo‘ladi. Har bir hududda tashkil etilgan tayanch-trener maktablar kelgusida o‘ziga xos “Baxtli maktab” loyihasi va “Mustahkam oila” trening dasturi tajribasini va ommalashtirish bo‘yicha trening markazga aylanishi ko‘zda tutilgan.
Loyihaning birinchi bosqichida tayanch-trener maktablar belgilanib olingan bo‘lsa, ikkinchi bosqich doirasida tayanch-trener maktablarning 70 nafar (har bir hududdan besh nafar) mutaxassislari 2018-yilning 5—7-noyabr kunlari Toshkent shahrida 3 kunlik “Baxtli maktab” loyihasini amaliyotga tatbiq etish konsepsiyasi hamda UNODC bilan hamkorlikda samarali sinovdan o‘tkazilgan “Mustahkam oila” trening-dasturida ishtirok etadi. Treninglar xalqaro va milliy psixolog trenerlar tomonidan olib boriladi.
Uch kun davomida mutaxassislar tomonidan nafaqat “Baxtli maktablarni“ tashkil etish shuningdek, o‘zaro hurmat, yaxshi xulqni rag‘batlantirish, orzu va maqsadlarga erishish, o‘smirlarni qoidalarga rioya etishi va ularga to‘g‘ri taqiq qo‘yish, o‘quvchi-yoshlarda jinoyatchilik va huquqbuzarlik, zo‘ravonlik, zararli odatlar (ichish, chekish, giyohvandlik)ga qarshi psixologik immunitetni vujudga keltirish, oilaning psixologik salomatligini yaxshilash, oilalarning, bolalar va yoshlarni har tomonlama rivojlanishiga yordam beradigan eng muhim oilaviy xususiyatlarini yaxshilash, ota-onalarning ta’lim jarayoniga ijobiy ta’sir etishi, oilaviy kelishuv, tengdoshlarning bosimiga qarshilik kabi dolzarb mavzularda yangi bilim va ko‘nikmalarga ega bo‘ladi.
Ushbu trening natijasida olgan bilimlari asosida mutaxassislar tomonidan tayanch-trener maktablarda muammoli oilalar va tarbiyasi qiyin o‘quvchilar uchun “Mustahkam oila” dasturi asosida muntazam 7 haftalik treninglar tashkil etiladi.
Eslatib o‘tish joiz, o‘tgan 2 yil mobaynida Xalq ta’limi vazirligi va UNODC hamkorligida “Mustahkam oila” trening dasturi bo‘yicha Toshkent shahridagi 19 ta maktabda o‘quvchilar va ularning oilalari bilan treninglar tashkil etildi hamda ijobiy ko‘rsatkichlarga erishilgan.
Shu bilan birga, tayanch-trener maktablarning pedagogik jamoasi har shanba “O‘zini o‘zi rivojlantirish kuni” doirasida Respublika o‘quv treninglarida ishtirok etgan trenerlar tomonidan “Mustahkam oila” dasturining hamda yoshlar bilan ishlash, jamoani jipslashtirish, stressni boshqarish kabi yo‘nalishlarida o‘z bilimlari va ko‘nikmalarini boshqa maktab vakillari bilan o‘rtoqlashadi. Ta’kidlash kerakki, yuqorida keltirilgan bilim-ko‘nikmalar jamlanmasiga doir metodik-materiallar (rivojlantiruvchi trening modullari) @maktabpsixolog Telegram tarmog‘i orqali har hafta juma kuni berib boriladi.
Loyiha doirasida tayanch-trener maktablarning pedagogik jamoasi olingan bilimlarni muntazam o‘z faoliyatida amaliyotda foydalanadilar hamda paydo bo‘lgan tajriba yoki muammolarni har shanba tashkil etiladigan seminar-treninglarda muhokama qiladi.
Izoh (0)