“Rosatom”, O‘zbekiston Fanlar akademiyasi va Vazirlar Mahkamasi huzuridagi atom energetikasini rivojlantirish agentligi o‘rtasida hamkorlik memorandumi imzolandi. Bu haqda “Daryo”ga agentlik matbuot xizmati ma’lum qildi.
Memorandum doirasida tomonlar O‘zbekistondagi ilk atom elektr stansiyasi personalini o‘qitish, atom energetikasi sohasida ta’lim va personalni tayyorlash borasida hamkorlikni amalga oshirishni rejalashtirmoqda.
Shuningdek, ehtiyojdan kelib chiqib atom energetikasi, yadro fani va texnologiyalari bo‘yicha qo‘shma ta’lim, jumladan, ikki tomonlama diplomlar dasturlarini tashkillash ko‘zda tutilmoqda.
Memorandum hamkorlikning boshqa yo‘nalishlari, xususan, atom energetikasi sohasida o‘quv va ilmiy adabiyotni ishlab chiqish, qisqa muddatli stajirovkalar, yozgi maktablar, seminarlarni tashkillash, o‘zbekistonlik talablar va o‘quvchilar o‘rtasida fizika, kimyo va matematika bo‘yicha tanlovlar o‘tkazishni ham o‘z ichiga olgan.
“Rosatom” O‘zbekistonda keng jamoatchilik va yadro texnologiyalari bilan qiziquvchilar uchun atom enegetikasi axborot markazi ochilishida ham ko‘maklashadi.
Izoh (0)