Vengriya poytaxti Budapesht shahrida shaxmat bo‘yicha bo‘lib o‘tgan First Saturday GM xalqaro turnirida o‘zbekistonlik yosh shaxmatchi Javohir Sindarov muvaffaqiyatli ishtirok etib, uchinchi grossmeysterlik talabini bajardi va 12 yoshida jahonning amaldagi eng yosh xalqaro grossmeysteriga aylandi. Bu haqda O‘zA xabar berdi.
Bundan bir yil oldin Javohir xalqaro shaxmat ustasi unvoniga sazovor bo‘lgandi. Javohir joriy yil iyun oyida “Voronej—2018” xalqaro musobaqasida birinchi, sentabr oyida Turkiyada o‘tkazilgan 20 yoshgacha o‘smirlar o‘rtasidagi jahon chempionatida ikkinchi grossmeysterlik talabini bajargandi.
Javohir 12 yosh 10 oy 8 kunda grossmeysterlik unvonini qo‘lga kiritib, jahon shaxmat tarixida Sergey Karyakindan (12 yosh-u 7 oy) keyin ikkinchi, shaxmat vatani bo‘lmish Osiyoda esa birinchi – eng yosh shaxmatchi sifatida o‘z nomini tarix yilnomalariga muhrladi.
O‘tgan yili yana bir o‘zbekistonlik shaxmatchi Nodirbek Abdusattarov 13 yosh-u 1 oyda grossmeysterlik maqomiga erishgandi. 2018 yil iyun oyida esa Hindistonlik yosh shaxmatchi Rameshbabu Pragnanandxa 12 yosh 10 oy 13 kunda shunday unvonga sazovor bo‘lib, Nodirbekning “rekordi”ni yangilagandi. Javohir esa hind tengdoshini 5 kunga ortda qoldirib, jahonning eng yosh xalqaro grossmeysteri degan sharafli nomni yana O‘zbekistonga qaytardi.
Eslatib o‘tamiz, bu nomga shaxmat bo‘yicha amaldagi jahon chempioni Magnus Karlsen 13, jahon chempionlari Robert Fisher 15, Vladimir Kramnik 16, Garri Kasparov 17, Anatoliy Karpov, Vishanatan Anand 19, Mixail Tal 21, Tigran Petrosyan 23, Vasiliy Smislov 29, Mixail Botvinnik 39 yoshida sazovor bo‘lgan.
Jahon shaxmat tarixida eng yosh grossmeysterlar ro‘yxati:
Izoh (0)