Termiz temir yo‘l vokzalida Tojikistonda o‘tkaziladigan Turkmaniston madaniyati kunlarida ishtirok etish uchun Dushanbe shahriga yo‘l olgan turkmanistonlik san’at ustalari tantanali kutib olindi. Bu haqda “Daryo”ga Surxondaryo viloyati hokimligi matbuot xizmati xabar berdi.
Termiz temir yo‘l vokzalida qardosh xalqning turmush tarzi, an’ana va urf-odatlarini ifoda etuvchi etnografik shaharcha barpo etildi, unda hunarmandlar ko‘rgazma-yarmarkasi hamda milliy taomlar joy oldi.
Tadbirda so‘zga chiqqanlar turkmanistonlik madaniyat va san’at ustalarining yurtimizga, xususan 136 mingdan ortiq turkman millatiga mansub fuqarolar istiqomat qiladigan Surxondaryo viloyatiga tashrifi xalqlarimiz o‘rtasidagi do‘stlik rishtalarini yanada mustahkamlash, ikki tomonlama aloqalarni yanada rivojantirishga xizmat qilishini ta’kidladi.
Shundan so‘ng, Turkmaniston san’at ustalari ijrosida do‘stlik va tinchlikni tarannum etuvchi kuy-qo‘shiqlari yangradi. Ushbu madaniy tadbir surxondaryolik tinglovchilarga unutilmas uchrashuv onlarini taqdim etdi.
Izoh (0)