O‘zbekiston mudofaa vaziri Abdusalom Azizov 12-oktabr kuni Qozog‘iston va Rossiya mudofaa vazirlari bilan uchrashuv o‘tkazdi. Bu haqda Mudofaa vazirligi matbuot xizmatiga tayanib, “Gazeta.uz” xabar berdi.
Uchrashuvlarda tomonlar mudofaa sohasida O‘zbekiston—Qozog‘iston va O‘zbekiston—Rossiya hamkorligi holati va istiqbollari masalalarini muhokama qildi, harbiy-texnik yo‘nalishlarda o‘zaro manfaatli aloqalarni mustahkamlash bo‘yicha fikr almashildi.
Abdusalom Azizov rossiyalik hamkasbi bilan muloqotda Rossiya harbiy mutaxassislari bilan qo‘shma tadbirlarni o‘tkazish muhim ahamiyatga ega ekanligini ta’kidlab o‘tdi. Uning fikricha, 2017-yilning oktabrida Jizzax viloyatidagi “Forish” poligoni bazasida O‘zbekiston—Rossiya harbiy mashg‘ulotlarining o‘tkazilishi o‘zaro manfaatli aloqalarning boshlanishiga yangi turtki berdi.
Rossiya mudofaa mahkamasi rahbari Sergey Shoygu Rossiya O‘zbekistonni Markaziy Osiyoda, jumladan, xavfsizlik sohasida strategik sherik sifatida ko‘rishini ta’kidlab o‘tdi.
“Zamonaviy sharoitda xavf va tahdidlarga, ayniqsa, mintaqada xalqaro terrorizmning tarqalishiga qarshi birgalikda kurashish lozim”, — deya qo‘shimcha qildi Sergey Shoygu.
Abdusalom Azizov kelgusi yili bo‘lib o‘tadigan Xalqaro armiya o‘yinlari hamda Xalqaro xavfsizlik bo‘yicha Moskva anjumanida ishtirok etishga taklif qilindi.
O‘zbekiston va Rossiya mudofaa vazirlari 2019-yildagi harbiy hamkorlik rejasini hamda ikki davlat harbiy havo kemalari uchun O‘zbekiston va Rossiya havo kengliklaridan foydalanish to‘g‘risidagi hukumatlararo bitimni imzoladi. Hukumatlararo bitim harbiy yuklarni tashish va harbiy-transport samolyotlarining qo‘nishsiz parvozlarini amalga oshirish masalalarini tezkorlik bilan hal etishga imkon beradi.
Izoh (0)