2017-yil 6-iyunda Toshkent shahridagi “Ilk biznes” MChJga qarashli “Marmaris” restoranida dress-kod bilan bog‘liq voqea sodir bo‘lgandi. Bu haqda Raqobat qo‘mitasi matbuot xizmati ma’lum qildi.
D.Ro‘zmetov restoranga kirib kelganida egnida va oyog‘ida sport kiyimi bo‘lganligi sababli quriqlash xizmati hamda menejer tomonidan to‘xtatilib, restoranga kiritilmagan. Vaholanki, restoranda chet ellik mijozlar bemalol sport kiyimda (shortik, futbolka va krossovka) yurganligi ma’lum bo‘lgan.
Mazkur holat yuzasidan “Ilk biznes” MChJga nisbatan “Iste’molchilarning huquqlarini himoya qilish to‘g‘risida”gi qonunining tegishli moddalari buzilishi yuzasidan belgilangan tartibda ish qo‘zg‘atilib, qo‘mitaning maxsus komissiyasi tomonidan ko‘rib chiqildi.
Komissiya qaroriga asosan “Ilk biznes” MChJ iste’molchiga to‘liq va tushunarli ma’lumot taqdim etmaganlik hamda ko‘rsatilmagan xizmat uchun haq olishga yo‘l qo‘yilgan deb topilib, xuquqbuzarliklarni bartaraf etish bo‘yicha ko‘rsatma berildi. MChJ tomonidan iste’molchilarga restoran xizmatlarini ko‘rsatishda shaffoflikni ta’minlash, millati yoki ijtimoiy kelib chiqishiga qarab kamsitmaslik bo‘yicha chora-tadbirlar ko‘rish, iste’molchilarga restoran tomonidan ko‘rsatiladigan xizmatlar to‘g‘risida to‘liq va o‘z vaqtida ma’lumotlar taqdim etishni yo‘lga qo‘yish choralari ko‘rildi.
Raqobat qo‘mitasi tomonidan MChJning mas’ul mansabdori ma’muriy javobgarlik to‘g‘risidagi kodeksga asosan jarimaga tortildi.
Shuningdek, joriy yil iyul oyda fuqarolik ishlari bo‘yicha Shayxontohur tumani sudida D.Ro‘zmetovning “Ilk biznes” tomonidan unga yetkazilgan ma’naviy zarar undirish to‘g‘risidagi da’vo arizasi ko‘rib chiqildi. MChJ tomonidan mijozning iste’mol huquqi buzilgan deb topilib, uning foydasiga 1 million so‘m ma’naviy zarar undirildi.
Izoh (0)