2017 йил 6 июнда Тошкент шаҳридаги «Илк бизнес» МЧЖга қарашли «Мармарис» ресторанида дресс-код билан боғлиқ воқеа содир бўлганди. Бу ҳақда Рақобат қўмитаси матбуот хизмати маълум қилди.
Д.Рўзметов ресторанга кириб келганида эгнида ва оёғида спорт кийими бўлганлиги сабабли қуриқлаш хизмати ҳамда менежер томонидан тўхтатилиб, ресторанга киритилмаган. Ваҳоланки, ресторанда чет эллик мижозлар бемалол спорт кийимда (шортик, футболка ва кроссовка) юрганлиги маълум бўлган.
Мазкур ҳолат юзасидан «Илк бизнес» МЧЖга нисбатан «Истеъмолчиларнинг ҳуқуқларини ҳимоя қилиш тўғрисида»ги қонунининг тегишли моддалари бузилиши юзасидан белгиланган тартибда иш қўзғатилиб, қўмитанинг махсус комиссияси томонидан кўриб чиқилди.
Комиссия қарорига асосан «Илк бизнес» МЧЖ истеъмолчига тўлиқ ва тушунарли маълумот тақдим этмаганлик ҳамда кўрсатилмаган хизмат учун ҳақ олишга йўл қўйилган деб топилиб, хуқуқбузарликларни бартараф этиш бўйича кўрсатма берилди. МЧЖ томонидан истеъмолчиларга ресторан хизматларини кўрсатишда шаффофликни таъминлаш, миллати ёки ижтимоий келиб чиқишига қараб камситмаслик бўйича чора-тадбирлар кўриш, истеъмолчиларга ресторан томонидан кўрсатиладиган хизматлар тўғрисида тўлиқ ва ўз вақтида маълумотлар тақдим этишни йўлга қўйиш чоралари кўрилди.
Рақобат қўмитаси томонидан МЧЖнинг масъул мансабдори маъмурий жавобгарлик тўғрисидаги кодексга асосан жаримага тортилди.
Шунингдек, жорий йил июль ойда фуқаролик ишлари бўйича Шайхонтоҳур тумани судида Д.Рўзметовнинг «Илк бизнес» томонидан унга етказилган маънавий зарар ундириш тўғрисидаги даъво аризаси кўриб чиқилди. МЧЖ томонидан мижознинг истеъмол ҳуқуқи бузилган деб топилиб, унинг фойдасига 1 миллион сўм маънавий зарар ундирилди.
Изоҳ (0)