O‘zbekiston va Birlashgan Arab Amirliklari 3-oktabr kuni bir milliard dollarlik to‘g‘ridan to‘g‘ri investitsiyalar jamg‘armasini tuzish haqidagi bitimni imzoladi. Bitim Toshkentda bo‘lib o‘tgan O‘zbekiston — BAA biznes-forumida imzolangan. Bu haqda Spot xabar berdi.
BAAning O‘zbekistonga kelgan delegatsiyasi tarkibidan 40 kishi o‘rin olgan bo‘lib, unga mamlakat Savdo-sanoat palatasi raisi Ibrohim al-Mahmud boshchilik qilgan.
Biznes-forum yakunida tijoriy va uy-joy qurilishi, qayta tiklanadigan energiya, investitsion hamkorlik sohalarida bir qator ikki tomonlama hujjatlar imzolangan.
O‘zbekiston Tashqi iqtisodiy faoliyat milliy banki va Abu-Dabi taraqqiyot jamg‘armasi Samarqand shahrida savdo markazi va xalqaro mehmonxona qurilishi bo‘yicha bitim imzoladi. O‘zbekiston va Abu-Dabi Savdo-sanoat palatalari o‘rtasida ikki tomonlama hamkorlik bo‘yicha bitim imzolandi.
Investitsiyalar bo‘yicha davlat qo‘mitasi va Masdar (Abu Dhabi Future Energy Company PJSC) kompaniyasi qayta tiklanadigan energiya manbalarini joriy qilish, shamol va quyosh elektrostansiyalarini qurish sohasida hamkorlik yuzasidan kelishib oldi.
Bugungi kunda O‘zbekistonda to‘qimachilik mahsulotlari, qurilish materiallari, oziq-ovqat konservalari, yuvish vositalari, poligrafiya sanoati, ulgurji savdo va xizmatlar sohalarida BAA kapitali ishtirokidagi 100 ta korxona faoliyat ko‘rsatmoqda.
Izoh (0)