Ўзбекистон ва Бирлашган Араб Амирликлари 3 октябрь куни бир миллиард долларлик тўғридан-тўғри инвестициялар жамғармасини тузиш ҳақидаги битимни имзолади. Битим Тошкентда бўлиб ўтган Ўзбекистон — БАА бизнес-форумида имзоланган. Бу ҳақда Spot хабар берди.
БААнинг Ўзбекистонга келган делегацияси таркибидан 40 киши ўрин олган бўлиб, унга мамлакат Савдо-саноат палатаси раиси Иброҳим ал-Маҳмуд бошчилик қилган.
Бизнес-форум якунида тижорий ва уй-жой қурилиши, қайта тикланадиган энергия, инвестицион ҳамкорлик соҳаларида бир қатор икки томонлама ҳужжатлар имзоланган.
Ўзбекистон Ташқи иқтисодий фаолият миллий банки ва Абу-Даби тараққиёт жамғармаси Самарқанд шаҳрида савдо маркази ва халқаро меҳмонхона қурилиши бўйича битим имзолади. Ўзбекистон ва Абу-Даби Савдо-саноат палаталари ўртасида икки томонлама ҳамкорлик бўйича битим имзоланди.
Инвестициялар бўйича давлат қўмитаси ва Масдар (Abu Dhabi Future Energy Company PJSC) компанияси қайта тикланадиган энергия манбаларини жорий қилиш, шамол ва қуёш электростанцияларини қуриш соҳасида ҳамкорлик юзасидан келишиб олди.
Бугунги кунда Ўзбекистонда тўқимачилик маҳсулотлари, қурилиш материаллари, озиқ-овқат консервалари, ювиш воситалари, полиграфия саноати, улгуржи савдо ва хизматлар соҳаларида БАА капитали иштирокидаги 100 та корхона фаолият кўрсатмоқда.
Изоҳ (0)