Indoneziyada zilzila sodir bo‘layotganiga qaramay o‘z joyini tark etmagan 21 yoshli aviadispetcher bilan vidolashuv marosimi bo‘lib o‘tdi. Bu haqda Daily Mail nashriga tayanib, “RIA Novosti” xabar berdi.
Antonius Gunavan Agung 28-sentabr kuni Sulavesi orolida joylashgan Palu’s Mutiara SIS Al-Jufrie aeroportidagi ish joyida bo‘lgan. Dastlab 6,1 magnitudali yer osti silkinishlari sodir bo‘lgach, u boshqalar qatori binoni tark etmasdan, bortida yuzlab odam bo‘lgan Batik Air aviakompaniyasiga tegishli samolyotning havoga ko‘tarilishini kutgan.
Samolyot xavfsiz balandlikka ko‘tarilganiga amin bo‘lgach, binodan chiqishga harakat qilgan, biroq bu vaqtda magnituda 7,4 ballga yetib bo‘lgan edi.
U to‘rtinchi qavatdan sakrashga majbur bo‘lgan, oqibatda esa ko‘plab tan-jarohatlarini olgan.
Shifoxonada ko‘rsatilgan tez tibbiy yordamga qaramay, Antonius vafot etgan.
Izoh (0)