Suriyada 3 yil ichida 112 nafar rossiyalik harbiy halok bo‘ldi

Suriyada harbiy operatsiya olib borilayotgan uch yil ichida 112 nafar rossiyalik harbiy halok bo‘ldi. Bu haqda Rossiya Federatsiya Kengashining mudofaa va xavfsizlik bo‘yicha qo‘mitasi raisi Viktor Bondaryovga tayanib, “Interfaks” xabar berdi.

“Ayni vaqtda Qurolli kuchlarimizning Suriyadagi talafoti 112 kishini tashkil qiladi, bularning deyarli yarmi An-26 halokati va urib tushirilgan Il-20 ulushiga to‘g‘ri keladi. Texnikadan 8 ta samolyot, 7 ta vertolyot va, ehtimol, bir-ikkita BTR va zirhli avtomobil yo‘qotilgan”, — deya aniqlik kiritdi u.

Talafotlar haqida gapirar ekan, senator Afg‘onistondagi urushni esga oldi. O‘shanda, uning aniqlik kiritishicha, uch yil ichida 4,8 ming kishi halok bo‘lgan. “‘Progressiv G‘arb’ bilan ham taqqoslaymiz: Iroqdagi urushning uch yili ichida (2003—2006) Amerika koalitsiyasi 2515 nafar harbiy xizmatchini (shuning 2309 nafari AQShniki), 10—20 ta ‘Abrams’ tanklarini, bir necha o‘nlab BTRlarni, kamida 50 ta ‘Bredli’ BMPlarni, 15 ta samolyot va 80 ga yaqin vertolyotlarini yo‘qotgan”, — dedi Bondaryov.