Javohir Zokirov qaysi filmda aktyordan ko‘ra eshakka ko‘proq haq to‘langaniga oydinlik kiritdi (video)

Aktyor va rejissor Javohir Zokirov “Daryo” internet-nashriga eksklyuziv intervyu berdi. Intervyuni jurnalist Feruz Muhammad tashkillashtirdi.

Aktyor bir necha kun oldin Instagram’dagi sahifasida tog‘da syomkada bo‘lgani, u yerda ma’lum bo‘lishicha, o‘zbek aktyorining bir kunlik o‘rtacha gonorari 160 ming so‘m, syomkada foydalanilgan Malibu avtomobilining 20 daqiqalik ijara haqi 400 ming so‘m, eshakning ijarasi esa 180 ming so‘m ekanligi haqida video post joylagan edi.

Aktyor suhbat davomida ushbu post haqidagi savollarga quyidagicha javob berdi.

— “O‘zbek aktyorining xizmat haqidan ko‘ra kinoga tushayotgan eshakning ijara narxi qimmatroq”, mazmunidagi postni joylashingizga nima sabab bo‘ldi?

— Bu xarakterdan kelib chiqadigan narsa, meni xarakterim shunaqa, o‘zimni ushlab tura olmayman, bor gapni shartta-shartta aytib tashlayman.  Shuning uchun suratga olish maydonida bo‘lgan voqeadan kelib chiqib Instagram’ga post joyladim, shu xolos.

— Qaysi filmning suratga olish jarayoni edi?

— Bu film davlat buyurtmasi bilan suratga olinayotgan “Parvoz” deb nomlangan film edi. O‘sha filmda kichikroq rolni ijro etdim.

— Siz bir necha yillardan buyon davlat buyurtmasi bilan suratga olinayotgan filmlarda suratga tushib kelasiz, avvallari gonorar masalasida vaziyat qanday edi?

— Bilasizmi, u vaqtda ya’ni 2-3 yil oldin bundan ham kam gonorar to‘lanar edi. Hozir  yangi imkoniyatlar yaratilgani uchun bu gonorarning oshgani.

— Xususiy kinostudiyalarda bu borada ahvol qanday?

— Xususiy kinostudiyalarga tashakkurlar bildiramiz. Chunki xususiy filmlarda gonorarlarimiz kattaroq.

— Saytimizga bergan intervyularingizdan birida ilk o‘ynagan filmlaringizdan biri “Bo Ba Bu”da “1000 dollarga yaqin gonorar olganman”, degan edingiz. U filmning suratga olinganiga ham yigirma yilcha bo‘lib qoldi. Bu vaqt mobaynida gonoraringiz oshdimi yoki hali ham o‘shanday turibdimi?

— Hozir xususiy kinostudiyalarda o‘sha gonorardan 10 barabor ko‘proq gonorar olaman. Aslida davlat buyurtmasi bilan suratga olinayotgan filmlarda bundan ham ko‘proq bo‘lishi kerak deb o‘ylayman.