Актёр ва режиссёр Жавоҳир Зокиров «Дарё» интернет-нашрига эксклюзив интервью берди. Интервьюни журналист Феруз Муҳаммад ташкиллаштирди.
Актёр бир неча кун олдин Instagram’даги саҳифасида тоғда съёмкада бўлгани, у ерда маълум бўлишича, ўзбек актёрининг бир кунлик ўртача гонорари 160 минг сўм, съёмкада фойдаланилган Malibu автомобилининг 20 дақиқалик ижара ҳақи 400 минг сўм, эшакнинг ижараси эса 180 минг сўм эканлиги ҳақида видео пост жойлаган эди.
Актёр суҳбат давомида ушбу пост ҳақидаги саволларга қуйидагича жавоб берди.
— «Ўзбек актёрининг хизмат ҳақидан кўра кинога тушаётган эшакнинг ижара нархи қимматроқ», мазмунидаги постни жойлашингизга нима сабаб бўлди?
— Бу характердан келиб чиқадиган нарса, мени характерим шунақа, ўзимни ушлаб тура олмайман, бор гапни шартта-шартта айтиб ташлайман. Шунинг учун суратга олиш майдонида бўлган воқеадан келиб чиқиб Instagram’га пост жойладим, шу холос.
— Қайси фильмнинг суратга олиш жараёни эди?
— Бу фильм давлат буюртмаси билан суратга олинаётган «Парвоз» деб номланган фильм эди. Ўша фильмда кичикроқ ролни ижро этдим.
— Сиз бир неча йиллардан буён давлат буюртмаси билан суратга олинаётган фильмларда суратга тушиб келасиз, авваллари гонорар масаласида вазият қандай эди?
— Биласизми, у вақтда яъни 2-3 йил олдин бундан ҳам кам гонорар тўланар эди. Ҳозир янги имкониятлар яратилгани учун бу гонорарнинг ошгани.
— Хусусий киностудияларда бу борада аҳвол қандай?
— Хусусий киностудияларга ташаккурлар билдирамиз. Чунки хусусий фильмларда гонорарларимиз каттароқ.
— Сайтимизга берган интервьюларингиздан бирида илк ўйнаган фильмларингиздан бири «Бо Ба Бу»да «1000 долларга яқин гонорар олганман», деган эдингиз. У фильмнинг суратга олинганига ҳам йигирма йилча бўлиб қолди. Бу вақт мобайнида гонорарингиз ошдими ёки ҳали ҳам ўшандай турибдими?
— Ҳозир хусусий киностудияларда ўша гонорардан 10 барабор кўпроқ гонорар оламан. Аслида давлат буюртмаси билан суратга олинаётган фильмларда бундан ҳам кўпроқ бўлиши керак деб ўйлайман.
Изоҳ (0)