Avval xabar berilganidek, Italiya poytaxti Rim shahrida Jahon sog‘liqni saqlash tashkiloti Yevropa mintaqaviy byurosining 68-sessiyasi bo‘lib o‘tmoqda. Unda O‘zbekiston delegatsiyasi ham ishtirok etyapti. Bu haqda “Daryo”ga Sog‘liqni saqlash vazirligi axborot xizmati ma’lum qildi.
Sessiyada tibbiyot sohasida global darajadagi masalalar atroflicha ko‘rib chiqilmoqda. Chunonchi, ekologiyaning dunyo xalqlari salomatligiga ta’siri, oziq-ovqat standartlari, birlamchi tibbiy yordamning o‘rni hamda turli yuqumli kasalliklarning oldini olish, shuningdek, dori-darmon narxlari, tamaki va alkogol iste’molining zararlari, jismoniy faollikning ahamiyati, semirishning oqibatlari keng muhokama etilmoqda.
Tadbir doirasida sog‘liqni saqlash vaziri Alisher Shodmonov Jahon sog‘liqni saqlash tashkiloti bosh direktori Tedros Gebreyesus bilan uchrashdi. Muloqot chog‘ida O‘zbekistonda so‘nggi yillarda sog‘liqni saqlash tizimidagi ijobiy o‘zgarishlar, aholiga ko‘rsatilayotgan tibbiy xizmatlar darajasining oshirilayotgani, shuningdek, sohada qabul qilinayotgan me’yoriy hujjatlar, istiqboldagi reja va dasturlar haqida ma’lumot berildi.
Tedros Gebreyesus JSST va O‘zbekiston o‘rtasida ko‘p tomonlama hamkorlikni yanada rivojlantirish va qo‘llab-quvvatlashga doimo tayyor ekanini hamda O‘zbekistonga amalga oshirilajak tashrifni intiqlik bilan kutayotganini bildirdi.
O‘zbekiston delegatsiyasi Rossiya, Belarus, Turkiya, Qozog‘iston, Armaniston, Ozarbayjon, Qirg‘iziston va Tojikiston vakillari bilan o‘zaro hamkorlik hamda istiqbolli rejalar xususida ikki tomonlama samarali uchrashuvlar o‘tkazdi.
Sessiya ishi davom etmoqda.
Izoh (0)