De Mistura “Jabhat an-Nusra” jangarilari jangovar xlor ishlab chiqarishi mumkinligini bildirdi

Suriya hukumati va “Jabhat an-Nusra” terrorchilik tashkilotining jangarilari jangovar xlor ishlab chiqarish imkoniyatiga ega. Bu haqda BMTning Suriya bo‘yicha maxsus elchisi Staffan de Mistura 4-sentabr kungi brifingda ma’lum qildi, deb yozadi “RIA Novosti”.

“Bir tomondan Suriya hukumati ham, “an-Nusra” terrorchilik tashkiloti ham jangovar xlor ishlab chiqarish imkoniyatiga ega ekanligini tasdiqlayman. Jangovar xlor kimyoviy hujum deb hisoblanish imkoniga ega. U havodan og‘irroq bo‘lib, sog‘liqga katta zarar keltiradi”, — dedi u “an-Nusra” Idlibda kimyoviy hujum uyushtirishi mumkinligi ehtimolini izohlay turib.

Shu bilan bir paytda, de Mistura Suriyada har qanday kimyoviy qurol, shu jumladan jangovar xlor qo‘llashga yo‘l qo‘yib bo‘lmasligini ta’kidlab o‘tdi.