O‘zbekiston Yozuvchilar uyushmasida mamlakatimiz tinchligi yo‘lida jon fido qilgan harbiy xizmatchilarning hayoti aks ettirilgan “Mard o‘g‘lonlar nomi barhayot” nomli kitob taqdimoti bo‘lib o‘tdi. Bu haqda Mudofaa vazirligi matbuot xizmati “Daryo”ga ma’lum qildi.
Taqdimotda Yozuvchilar uyushmasi raisi Sirojiddin Sayyid, Qurolli Kuchlar tizimidagi vazirlik va idoralarning mas’ul ofitserlari hamda halok bo‘lgan harbiy xizmatchilarning oila a’zolari ishtirok etdi.
O‘zbekiston Respublikasi Prezidenti tashabbusi bilan yaratilgan “Mard o‘g‘lonlar nomi barhayot” kitobi o‘zbek xalqining ana shunday botir, jasur va fidoyi farzandlari xotirasiga hurmat va ehtirom namunasi bo‘ldi, desak xato bo‘lmaydi.
“Otam katta leytenant Shermuhammad Ashirov bilan doim faxrlanaman. Ular menga Vatan uchun jon fido qilish barhayot yashash ekanini anglatdi. “Mard o‘g‘lonlar nomi barhayot” xotira kitobi men uchun eng muqaddas kitoblardan biri bo‘lib qoladi. Chunki unda yuzlab elparvar kishilar qatori mening otamning ham nomlari bor... ”, – deydi marhumning qizi Mahmuda Ergashaliyeva.
Mazkur kitob har bir yosh avlod O‘zbekiston Respublikasi mustaqilligini mustahkamlash, tinchlik va osoyishtaligini asrashga birdek mas’ul ekanligini yanada teranroq anglatish, ularda vatanparvarlik tuyg‘ularini shakllantirish yo‘lida xizmat qiladi.
Izoh (0)