O‘zbekiston mustaqilligining 27 yilligi munosabati bilan Prezident Shavkat Mirziyoyev nomiga xorijiy davlatlar va hukumatlar rahbarlaridan samimiy qutlovlar kelmoqda. Bu haqda O‘zA xabar berdi.
Xususan, Tojikiston prezidenti Emomali Rahmondan quyidagi mazmunda tabriknoma keldi:
O‘zbekiston Respublikasi Prezidenti
Shavkat Mirziyoyev Janobi Oliylariga
Qadrli Shavkat Miromonovich!
Tojikiston xalqi nomidan va shaxsan o‘z nomimdan Sizni va Siz orqali butun qardosh O‘zbekiston xalqini O‘zbekiston Respublikasining milliy bayrami – Mustaqillik kuni munosabati bilan chin yurakdan muborakbod etish va eng ezgu tilaklarimni bildirish menga katta mamnuniyat bag‘ishlaydi.
Siz uzoqni ko‘zlab yuritayotgan siyosat hamda mamlakat hayotining iqtisodiy, siyosiy va ijtimoiy sohalaridagi muhim yangilanishlar bugun o‘z samaralarini berib, O‘zbekistonning jahon hamjamiyatidagi obro‘sini muttasil yuksaltirmoqda.
Ushbu muvaffaqiyatlar yaqin qo‘shni sifatida O‘zbekiston bilan ko‘plab do‘stlik rishtalari orqali bog‘langan Tojikistonni ham quvontirmoqda.
Xalqlarimizni madaniy-ma’naviy yaqinlik, o‘zaro manfaatlarni hurmat qilish, tinch va totuv yashashga intilish, ko‘p asrlik do‘stlik va yaxshi qo‘shnichilikka asoslangan bebaho tajriba bog‘lab turadi.
O‘zbekiston bilan munosabatlar Tojikiston tashqi siyosatining asosiy ustuvor yo‘nalishi bo‘lib kelgan va shunday bo‘lib qoladi.
Biz Tojikiston bilan O‘zbekiston o‘rtasidagi ko‘p qirrali sheriklikning ezgu va konstruktiv muhitidan, shuningdek, hamkorligimiz xalqlarimiz va butun mintaqaning tub manfaatlari yo‘lida izchil rivojlanib borayotganidan g‘oyat mamnunmiz.
Biz, hurmatli Shavkat Miromonovich, Sizning bu yo‘ldagi shaxsiy hissangizni yuksak qadrlaymiz.
Yaqinda go‘zal mamlakatingizga davlat tashrifi davomida Siz bilan bo‘lib o‘tgan samarali uchrashuvlarimizni, tarixiy hujjat – Strategik sheriklik to‘g‘risidagi shartnoma imzolaganimizni alohida mamnuniyat bilan yodga olaman.
Ishonchim komil, ushbu tashrif doirasida imzolangan hujjatlar, shuningdek, iqtisodiyotning strategik tarmoqlarida qator keng miqyosli qo‘shma loyihalarni amalga oshirishga qaratilgan kelishuvlarning ro‘yobga chiqishi mamlakatlarimizning uzoq muddatli istiqbolga mo‘ljallangan samarali hamkorligiga yangi va kuchli sur’at bag‘ishlaydi.
Fursatdan foydalanib, bundan buyon ham Siz bilan birgalikda mamlakatlarimiz o‘rtasidagi azaliy do‘stlik an’analari va o‘zaro manfaatli hamkorlikni yangi bosqichda rivojlantirishga barcha kuchlarni yo‘naltirishga tayyor ekanimni bildiraman.
Birgalikdagi sa’y-harakatlarimiz tufayli mamlakatlarimiz o‘rtasidagi munosabatlar bundan buyon ham Tojikiston va O‘zbekiston xalqlari farovonligi yo‘lida yanada mustahkamlanib borishiga ishonaman.
Ushbu qutlug‘ bayram kunlarida Sizga, muhtaram Shavkat Miromonovich, mustahkam sog‘lik, mamlakat ravnaqi yo‘lidagi rejalaringiz va intilishlaringiz ro‘yobida katta zafarlar, qardosh O‘zbekiston xalqiga esa tinchlik, baxt-saodat va farovonlik tilashga ijozat bergaysiz.
Singapur Respublikasi Prezidenti Halima Yoqub
Birlashgan Arab Amirliklari Prezidenti shayx Xalifa bin Zoid Ol Nahayon
Birlashgan Arab Amirliklari Qurolli Kuchlari Oliy bosh Qo‘mondoni o‘rinbosari shayx Muhammad bin Zoid Ol Nahayon
Birlashgan Arab Amirliklari Bosh vazirining o‘rinbosari, ichki ishlar vaziri shayx Sayf bin Zoid Ol Nahayon
Falastin Davlati Prezidenti, Falastin Ozodlik tashkiloti Ijroiya qo‘mitasi raisi Mahmud Abbos
Qutlovlar kelishi davom etmoqda.
Izoh (0)